Shymkentte «Uly dala ulandary» atty dombyrashylar fleshmoby ótti. Fizika-matematika baǵytyndaǵy Nazarbaev ziiatkerlik mektebiniń muǵalimderi men oqýshylary adam kóp shoǵyrlanǵan «Shymkent Plaza» saýda ortalyǵynda qazaqtyń birneshe kúiin oryndady, dep habarlaidy "Ult aqparat" QazAqparat agenttigine silteme jasap.
50-ge jýyq dombyrashy kúmbirlete kúi tartqanda olarǵa tamsana da tańyrqai qaraǵandar kóp boldy. Qurmanǵazynyń «Saryarqasy» men «Balbyraýyn», Súgirdiń «Bozingenin» bir demmen, erekshe leppen tartyp, jinalǵandarǵa erekshe kóńil-kúi syilady.
Jalpy, jyl saiyn dombyrashylar fleshmobyn ótkizý ziiatkerik mektebiniń oqýshylary úshin dástúrge ainalǵan. Óitkeni bilim oshaǵynda «100 kúidiń tarihy» atty joba birneshe jyldan beri júzege asyrylyp keledi. Osy joba aiasynda ótkendi umytpai, búgingini ulyqtaýǵa arnalǵan túrli sharalar uiymdastyrylyp otyrady.
Aita óteiik, atalǵan fleshmob bir mezette Qazaqstannyń barlyq oblysyndaǵy Nazarbaev ziiatkerlik mektepterinde uiymdastyryldy.
Bul shara arqyly Ziiatkerlik mekteptiń oqýshylary jan-jaqty bilimdi bolýlarymen qatar, ónerde de zerek ekendikterin de dáleldedi.
«Naǵyz qazaq – qazaq emes, naǵyz qazaq - dombyra» dep beker aitylmasa kerek. Óitkeni tórinen oryn berip, ilip qoiatyn qara dombyra halqymyz úshin qashanda qasietti sanalǵan. Al qos ishekti kúmbirletip, qýanyshy men qaiǵysyn, minezi men tektiligin, bar bolmysy men jan dúniesin kórsete otyryp, tógilte shertip salatyn kúidi ata-babamyz árdaiym urpaǵyna mura etip qaldyrǵan. Al búgingi urpaqtyń sol bailyqty, asyl murany kózdiń qarashyǵyndai saqtap qana qoimai, boiyna sińirýi qýantady.
