Qazaqstan Respýblikasy Mádeniet jáne sport ministrliginiń «Qazaqkontsert» memlekettik kontserttik uiymy Memleket basshysy N.Á.Nazarbaevtyń «Bolashaqqa baǵdar – rýhani jańǵyrý» maqalasynda kórsetilgen jobalardy júzege asyrý úshin júieli jumystar atqaryp keledi. Ulttyq bolmystyń ózegi bolyp sanalatyn qazaqstandyq mádenietti álemge tanytý úshin Elbasy «Jahandaǵy zamanaýi qazaqstandyq mádeniet» jobasyn usynǵany barshamyzǵa aian.
Otandyq mádeniettiń zamanaýi beinesin ashyp, onyń álemdik arenaǵa jol tartýyna oń yqpal etý jáne joǵaryda atalǵan iri mádeni jobany iske asyrý maqsatynda, QR Mádeniet jáne sport ministrliginiń qoldaýymen «Qazaqkontsert» memlekettik kontserttik uiymy jáne Respýblikalyq nemis drama teatry 2017 jylǵy jeltoqsan aiynda Eýropa memleketteriniń astanalarynda úlken gastroldik týrne ótkizýdi josparlaýda. «Qazaqkontsert» memlekettik kontserttik uiymynyń «Astana Musical» teatry elimizdiń rýhani qundylyqtaryna ainalǵan halyq ánderi men halyq kompozitorlarynyń shyǵarmalary, ulttyq operamyz ben klassikalyq mýzykamyzdyń injý-marjandary negizinde dala teatrynyń elementterin paidalana otyryp «Uly Dala teatry» ataýymen "Qyz Jibek" etno-folklorlyq miýziklin usynady. Al Respýblikalyq nemis dramy teatrynyń ártisteri qazaq ulttyq dramatýrgiiasynyń shyńy – M.Áýezovtyń «Qaragóz» spektaklin nemis tilinde kórsetedi (qoiylymdar frantsýz, nemis, aǵylshyn, orys tilderinde sýbtitrmen júredi).
Úlken gastroldik týrdyń marshrýty iri mádeni ortalyqtarǵa ainalǵan kelesi qalalardy qamtidy: Berlin (Germaniia) – Parij (Frantsiia) - Kann (Frantsiia) – Vena (Avstriia)-Briýssel (Belgiia) - Máskeý (Resei).
Ǵasyrlar qoinaýynan syr shertetin «Qyz Jibek» týyndysy – lqazaqtyń liro-epostyq jyrynyń jaýhary. Tragediia keiipkerleri – Jibek pen Tólegen álemge áigili Romeo men Djýletta siiaqty qazaq halqy úshin mahabbattyń simvoly ispettes. Oqiǵalar negizinen jas batyr Tólegen, Qyz Jibek jáne el arasynda erjúrektigimen, kúsh-qairatymen aty shyqqan batyr Bekejan arasyndaǵy qarym-qatynastar tóńireginde órbidi de, aqyry Tólegen qyzǵanyshtyń qurbany bolady. Súigeninsiz Jibekke de ómir joq. El birligi men tutastyǵy ideiasy qatar órilip, halyqtyń oi-armany men ańsary tanylatyn, boiaýy jarqyn qoiylymda ulttyń ómiri men tyǵyz bailanysty dástúrler de, bata sóz, qarǵys, joqtaý, zar, kóńil aitý, qoshtasý jáne t.b. jaqsy kórinis tapqan. Jibek beinesi - sulýlyq pen ásemdiktiń nyshany, qazaq halqynyń maqtanyshy, rýhani eskertkish. Dala teatrynyń negizinde sahnalanǵan «Uly dala teatry» etnofolklorlyq miýziklinen kórermen qazaq halqynyń ulttyq tanymymen etene tanysýǵa múmkindik alady. Sondai-aq, spektaklde qos aqynnyń sóz tartysy, oi qaqtyǵysymen qatar sýyrypsalmalyq qabiletin dáripteitin qazaqtyń ulttyq óneri aqyndar aitysy oryn alǵan.
Qoiýshy-rejisseri jáne joba avtory – «Astana Musical» teatrynyń kórkemdik jetekshisi, «Qazaqkontsert» MKU direktory, Qazaqstannyń eńbek sińirgen qairatkeri Ashat Maemirov. Sonymen qatar, qoiylym barysynda «Astana sazy» etno-folklorlyq ansambli óner kórsetedi.
Qazaqstandyq ártisterdiń halyqaralyq gastrolderi «Jahandaǵy zamanaýi qazaqstandyq mádeniet» jobasyn iske asyrýǵa zor úles qosyp, otandyq mádenietti álemge Birikken ulttar uiymynyń alty tilinde tanystyrýdyń ońtaily tásiline ainalatynyna senimdimiz.
