Qazaqtyń bas aqyny – Abaidyń ádebi muralary arqyly jastardyń boiyna ulttyq qundylyqtar men rýhani-adamgershilik qasietterin qalyptastyrý, tereń maǵynaly sóz marjandary men oi jaýharlaryn keńinen nasihattaý maqsatynda Tárbie basqarmasy jáne «Hákim Abai» ǵylymi-zertteý ortalyǵynyń birlese uiymdastyrýymen «Qaitalanbas danalyqtyń beinesi» atty tanymdyq shara ótkizildi.
Uly Abaidyń týǵan kúnine orailastyrylǵan shara Abai atyn iemdengen qara shańyraqtyń bas ǵimaratynyń aldyndaǵy Hákim eskertkishine gúl shoǵyn qoiý rásimimen bastalyp, «Abaitaný» murajaiynda ǵulama aqynnyń rýhyna taǵzym jasaldy. Odan ári shara «Abai – dana, Abai – dara» atty keńeitilgen dóńgelek ústelge ulasty. Dóńgelek ústel jumysyn ýniversitetimizdiń Tárbie isi jónindegi prorektory Janatbek Ishpekbaev ashyp, sóz kezegin «Hákim Abai» ǵylymi-zertteý ortalyǵynyń direktory Jabal Shoiynbetke berdi. Abai álemin tereńinen zerttep, zerdelep júrgen ǵalym-ustaz óz sózinde jýyrda ǵana Abaidyń «Jidebai-Bórili» memlekettik qoryq-mýzeiine jasaǵan saiahaty barysynda alǵan áserimen bólisip, áli de bolsa zerttelýdi qajet etetin tarihi jádigerler men ádebi qundylyqtar týraly mazmundy áńgime órbitti.
Óz kezeginde ýniversitetimizdiń belsendi jastary Hákimniń muralaryn nasihattaý maqsatynda qara shańyraǵymyzda atqarylyp jatqan taǵlymy men tálimi mol igi sharalarǵa toqtala kele, uly aqynnyń murasyn aýqymy keń jobalar arqyly dúniejúzine tanytý boiynsha usynystaryn bildirdi.
Shara qorytyndysynda belsendi jastarymyz ýniversitetimizdiń qurylymdyq bólimshelerinde «Abaidy oqy, tańyrqa...» atty aktsiiasyn ótkizip, «Abai aitady...» atty aqparatty kitapshalaryn taratty.
Qazyna Bekbenbetova
