Pavlodar oblysynda Ulttyq dombyra kúnine orai aýqymdy rýhani-mádeni is-shara ótti. Onyń aiasynda óńirdiń 5 myńǵa jýyq oqýshysy kórnekti qazaq kompozitory, ǵalym, Qazaqstandaǵy kásibi mýzykalyq bilim berý isiniń negizin qalaýshylardyń biri Ahmet Jubanovtyń «Bi» kúiin bir mezette oryndap, ulttyq mýzyka ónerine qurmet kórsetti, dep habarlaidy ult.kz.
Myńdaǵan dombyranyń bir mezette kúmbirleýi urpaqtar sabaqtastyǵynyń, ulttyq mádenietke degen súiispenshilik pen halqymyzdyń rýhani qundylyqtaryna degen qurmettiń jarqyn kórinisine ainaldy.
Biylǵy merekeniń máni erekshe. Sebebi ol Ahmet Jubanovtyń týǵanyna 120 jyl tolýymen tuspa-tus kelip otyr.
Aýqymdy sharaǵa «Mýzykalyq kolledj - daryndy balalarǵa arnalǵan mýzykalyq mektep-internaty» kesheni, M. Kataev atyndaǵy oblystyq Oqýshylar saraiy, qosymsha bilim berý uiymdary jáne Pavlodar oblysyndaǵy bilim berý uiymdarynyń oqýshylary qatysty.
«Mýzykalyq kolledj - daryndy balalarǵa arnalǵan mýzykalyq mektep-internaty» kesheni direktorynyń beiindik oqytý jónindegi orynbasary Dáýren Qýanov:
«Dombyra synybynyń ustazdary úshin Ulttyq dombyra kúni - taǵylymdyq máni zor erekshe mereke. Biyl bul kúnniń mańyzy odan saiyn arta tústi, óitkeni Ahmet Jubanovtyń týǵanyna 120 jyl tolyp otyr. Onyń bai shyǵarmashylyq murasy dombyra óneriniń úzdik dástúrlerin saqtap, ony jas urpaqqa jetkizýge shabyt beredi. Ulttyq mýzykaǵa degen súiispenshilik balalarymyzdyń júreginde máńgi saqtalyp, týǵan eliniń tarihy men mádenietine degen qurmetin nyǵaita bersin», - dedi.
9 «A» synyp oqýshysy Qarshyǵa Dýman:
«Men úshin Ulttyq dombyra kúni - erekshe mereke. Dombyra - halqymyzdyń rýhy men tarihyn urpaqtan urpaqqa jetkizetin qasietti aspap. Biylǵy merekeniń máni tipti tereńdei tústi, óitkeni Ahmet Jubanovtyń týǵanyna 120 jyl tolyp otyr. Biz, jas urpaq, onyń bai murasyn maqtan tutamyz, dombyra ónerin súiemiz jáne ony saqtap, damytýǵa árdaiym úles qosa beremiz», - dep óz áserimen bólisti.
Aýqymdy is-shara qazaqtyń kúi óneri men ulttyq mýzykalyq murasyn dáripteýdiń jarqyn úlgisine ainaldy. Ulttyq dombyra kúni myńdaǵan oqýshyny ulttyq mádeniet, el tarihy men tól ónerimizdiń qundylyqtary tóńiregine biriktirdi.
