پاۆلودار وبلىسىندا ۇلتتىق دومبىرا كٷنٸنە وراي اۋقىمدى رۋحاني-مەدەني ٸس-شارا ٶتتٸ. ونىڭ اياسىندا ٶڭٸردٸڭ 5 مىڭعا جۋىق وقۋشىسى كٶرنەكتٸ قازاق كومپوزيتورى, عالىم, قازاقستانداعى كەسٸبي مۋزىكالىق بٸلٸم بەرۋ ٸسٸنٸڭ نەگٸزٸن قالاۋشىلاردىڭ بٸرٸ احمەت جۇبانوۆتىڭ «بي» كٷيٸن بٸر مەزەتتە ورىنداپ, ۇلتتىق مۋزىكا ٶنەرٸنە قۇرمەت كٶرسەتتٸ, دەپ حابارلايدى ult.kz.
مىڭداعان دومبىرانىڭ بٸر مەزەتتە كٷمبٸرلەۋٸ ۇرپاقتار ساباقتاستىعىنىڭ, ۇلتتىق مەدەنيەتكە دەگەن سٷيٸسپەنشٸلٸك پەن حالقىمىزدىڭ رۋحاني قۇندىلىقتارىنا دەگەن قۇرمەتتٸڭ جارقىن كٶرٸنٸسٸنە اينالدى.
بيىلعى مەرەكەنٸڭ مەنٸ ەرەكشە. سەبەبٸ ول احمەت جۇبانوۆتىڭ تۋعانىنا 120 جىل تولۋىمەن تۇسپا-تۇس كەلٸپ وتىر.
اۋقىمدى شاراعا «مۋزىكالىق كوللەدج - دارىندى بالالارعا ارنالعان مۋزىكالىق مەكتەپ-ينتەرناتى» كەشەنٸ, م. كاتاەۆ اتىنداعى وبلىستىق وقۋشىلار سارايى, قوسىمشا بٸلٸم بەرۋ ۇيىمدارى جەنە پاۆلودار وبلىسىنداعى بٸلٸم بەرۋ ۇيىمدارىنىڭ وقۋشىلارى قاتىستى.
«مۋزىكالىق كوللەدج - دارىندى بالالارعا ارنالعان مۋزىكالىق مەكتەپ-ينتەرناتى» كەشەنٸ ديرەكتورىنىڭ بەيٸندٸك وقىتۋ جٶنٸندەگٸ ورىنباسارى دەۋرەن قۋانوۆ:
«دومبىرا سىنىبىنىڭ ۇستازدارى ٷشٸن ۇلتتىق دومبىرا كٷنٸ - تاعىلىمدىق مەنٸ زور ەرەكشە مەرەكە. بيىل بۇل كٷننٸڭ ماڭىزى ودان سايىن ارتا تٷستٸ, ٶيتكەنٸ احمەت جۇبانوۆتىڭ تۋعانىنا 120 جىل تولىپ وتىر. ونىڭ باي شىعارماشىلىق مۇراسى دومبىرا ٶنەرٸنٸڭ ٷزدٸك دەستٷرلەرٸن ساقتاپ, ونى جاس ۇرپاققا جەتكٸزۋگە شابىت بەرەدٸ. ۇلتتىق مۋزىكاعا دەگەن سٷيٸسپەنشٸلٸك بالالارىمىزدىڭ جٷرەگٸندە مەڭگٸ ساقتالىپ, تۋعان ەلٸنٸڭ تاريحى مەن مەدەنيەتٸنە دەگەن قۇرمەتٸن نىعايتا بەرسٸن», - دەدٸ.
9 «ا» سىنىپ وقۋشىسى قارشىعا دۋمان:
«مەن ٷشٸن ۇلتتىق دومبىرا كٷنٸ - ەرەكشە مەرەكە. دومبىرا - حالقىمىزدىڭ رۋحى مەن تاريحىن ۇرپاقتان ۇرپاققا جەتكٸزەتٸن قاسيەتتٸ اسپاپ. بيىلعى مەرەكەنٸڭ مەنٸ تٸپتٸ تەرەڭدەي تٷستٸ, ٶيتكەنٸ احمەت جۇبانوۆتىڭ تۋعانىنا 120 جىل تولىپ وتىر. بٸز, جاس ۇرپاق, ونىڭ باي مۇراسىن ماقتان تۇتامىز, دومبىرا ٶنەرٸن سٷيەمٸز جەنە ونى ساقتاپ, دامىتۋعا ەردايىم ٷلەس قوسا بەرەمٸز», - دەپ ٶز ەسەرٸمەن بٶلٸستٸ.
اۋقىمدى ٸس-شارا قازاقتىڭ كٷي ٶنەرٸ مەن ۇلتتىق مۋزىكالىق مۇراسىن دەرٸپتەۋدٸڭ جارقىن ٷلگٸسٸنە اينالدى. ۇلتتىق دومبىرا كٷنٸ مىڭداعان وقۋشىنى ۇلتتىق مەدەنيەت, ەل تاريحى مەن تٶل ٶنەرٸمٸزدٸڭ قۇندىلىقتارى تٶڭٸرەگٸنە بٸرٸكتٸردٸ.
