Respýblikalyq biýdjettiń atqarylýyn baqylaý jónindegi Esep komitetiniń tóraǵasy Natalia Godýnova Ulttyq jobalar aiasynda salynatyn nysandardyń ár sharshy metrine shyǵyn limitin bekitýdi usyndy, dep habarlaidy QazAqparat.
«2021 jyly memlekettik josparlaý júiesiniń ózgerýimen este qaldy – memlekettik baǵdarlamalardan ulttyq jobalarǵa kóshtik. Byltyrǵy kúzden bastap Úkimet 10 Ulttyq jobany iske asyrýǵa kiristi. Onyń bárinde biýdjettik qarjylandyrýǵa basymdyq berilgen bolatyn. Ókinishke orai ol jospar oryndalmady. Jobalardyń 43 paiyzy jetkilikti qarjylandyrylǵan joq. Al eń negizgi máselelerdi tiimdi sheshý úshin tolyq kólemde qarjylandyrý qajet. Sondyqtan Ulttyq jobalardy túzetip, qarjylyq múmkindikterge sáikestendirý kerek. Bilýimizshe, Úkimet bul jumysty bastap ta ketti», - dedi Natalia Godýnova Parlamenttiń birlesken otyrysynda.
Sonda-aq ol Ulttyq jobalardyń igiligin halyqqa qalai jyldam jetkizýge bolatynyn atady.
«Ulttyq jobalar iske asýy múmkindiginshe qysqa merzimge mejelenýi kerek. Sonda ǵana onda qarastyrylǵan sharalar biznes pen halyqqa jyldam jetedi. Tiptik sheshimderden bólek, búkil el aýmaǵynda aimaqtarǵa bailanysty áleýmettik jáne ákimshilik nysandardyń 1 sharshy metrin salýǵa ketetin shyǵynnyń limitin bekitý qajet. Bul bólingen aqshaǵa kóbirek nysan salýǵa múmkindik beredi», - dedi Esep komitetitiń basshysy.
