Ár halyqtyń eń basty bailyǵy ol ana tili. Ol ár halyqtyń tarihtan tamyr tartar dástúri men mádenietin sabaqtastyrǵan ulttyq kody, eldiń jany, kúretamyr ózegi.
22 qyrkúiek – Qazaqstan Respýblikasy halyqtarynyń tilderi merkesi bolyp jariialanǵanyna da birshama ýaqyt ótti. Tarihqa kóz júgirtsek, 1989 jyly dál osy kúni elimizde alǵash ret «Tilder týraly» Zań qabyldanǵan bolatyn.
Qazaqstan kóp ultty memleket. Qazirgi tańda Uly dala elinde 130-dan astam ult pen ulystyń ókili tatý-tátti ómir súrip jatyr. Jáne olardyń árqaisynyń ana tili men ata dástúri bar. Ár ulttyń óz ana tilinde sóilep, damytýyna, órkendetýine barlyq jaǵdai da jasalǵan. Iaǵni, ár ulttyń til, salt-dástúri siiaqty airyqsha qundylyqtaryna joǵarǵy deńgeide qurmet bildiriledi.
25 qyrkúiek kúni osy atalǵan merekege orailastyrylyp Qazaqstan Respýblikasy Ulttyq ulanynyń Almaty qalasyndaǵy «Ońtústik» óńirlik qolbasshylylyǵynyń uiymdastyrýymen «Tilge qurmet - elge qurmet» atty Til festivali ótti.
Oǵan Almaty qalalyq ákimdiginiń, qalalyq máslihattyń, «Nur Otan» partiiasynyń, Qazaqstan Halqy Assambleiasynyń Almaty qalasy filialynyń ókilderi, sondai-aq qaladaǵy túrli ulttyq qoǵamdyq birlestikterdiń ókilderi qonaq bolsa, sharany «Ońtústik» óńirlik qolbasshylyǵy men 5571 áskeri bóliminiń ofitserleri men jaýyngerler quramy tamashalady.
Óziniń quttyqtaý sózinde Almaty qalasynyń Qazaqstan halqy Assambleiasy tóraǵasynyń orynbasary, Osetin etno-mádeni ortalyǵynyń tóraǵasy Qazbek Mamsýrov: «Til tek tildesý quraly ǵana emes, halyqtar arasyndaǵy dostyqtyń dánekeri bolyp tabylady. Qazir Qazaqstandy tórtkúl dúnie tanidy, moiyndady. Bul orynsyz maqtanysh emes, aqiqat aiǵaǵy. Mundai mereige, abyroiǵa ie bolýymyzdyń basty negizi – ol Qazaqstandy óz Otany sanaityn san alýan halyqtyń tatýlyǵy, dostyǵy ekeni daýsyz. Ana tili – adamnyń ǵumyr boiǵy serigi, rýhani qýaty. Bul kún – Ana tilin asqaqtatý arqyly ózindik bolmys-bitimin aishyqtai túsýge umtylǵan túrli ulystardyń tileginen týǵan mereke. Olai bolsa, barshańyzdy osy merekemen quttyqtaimyn», - dep atap ótti.
Al Almaty qalasy Máslihatynyń depýtaty, Qazaqstan halqy Assambleiasy janyndaǵy analar keńesiniń tóraiymy Nuriia Niiazova da Tilder merekesiniń mán-mańyzyna toqtalyp, Elbasynyń salqaly saiasatynyń arqasynda Qazaqstannyń jetken jetistikterin baiandaǵan taǵylymdy áńgime órbitti. «Qazaqstan túrli-tústi metaldarymen, kómiri, munaiymen jáne basqa da qazba bailyqtarymen maqtana alady. Alaida eń basty bailyǵy – ulttar men ulystar. «Halyqtar dostyǵynyń laborotoriiasy» dep atalatyn týǵan ólkemiz ár ult ókilderin orasan zor súiispenshilikpen óz qushaǵyna qushty. Qansha ult bolsa, sonsha salt-dástúr, bir-birine esh uqsamaityn bileri men ánderi bar. Biraq biz dostyq tilinde tildesip úirengenbiz. Al dostyq tilinen artyq til bul álemde joq. Birlikti basty baq sanaǵan Qazaq eli sonysymen de búkil álemge úlgi», - dep toqtaldy.
Taǵylymdy shara barysynda ár ult pen ulystardyń Qazaq jerine qonystaný tarihynan syr shertken tarihi málimetter, sondai-aq salt-dástúleri jaily taǵylymdy baiandamalar jasaldy. Sońynan Qazaq eliniń jahandyq damý úrdisinen qalmaýy úshin zamana usynyp otyrǵan talap –úshtildiliktiń úlken máni jaily tolǵaqty oilar aityldy. Sondai-aq, orys, grýzin, osetin, armian, tatar, nemis, ózbek, taǵy basqa ulttar men ulystardyń qoǵamdyq birlestikteriniń ónerpazdary án men biden shashý shashyp, kórermenderdiń yqylasyna bólenedi.
Sharanyń sońynda Ulttyq ulan «Ońtústik» óńirlik qolbasshylyǵynyń memlekettik tildi damytý jónindegi aǵa ofitseri maior Danara Baimaǵanbetova jinalǵan qaýymdy Tilder merkesimen quttyqtap, atsalysqan azamattarǵa alǵysyn bildirip, olardy «Ońtústik» óńirlik qolbasshylyq qolbasshysy general-maior Qairat Aqtanovtyń atynan Alǵys hattarmen marapattady.
Maior Arman Áýbákirov,
«Ońtústik» óńirlik qolbasshylyǵy
