Biylǵy oqý jylynan bastap Qazaqstan Respýblikasy Ulttyq ulanynda jańa joba qolǵa alyndy. Jastardy eldikke tárbieleitin patriottyq is-shara «Elbasy sabaqtary» dep atalady.
Atalǵan sabaqtar quqyqtyq tártip áskerleriniń respýblikadaǵy barlyq qurylymdyq áskeri bólimderinde ótkiziletin bolady. Áskerge rýh berýshi tárbieshi ofitserler Otan kúzetinde júrgen jaýyngerlerge, jalpy áskeri ujymnyń ár múshesine Qazaqstan Respýblikasynyń Tuńǵysh Prezidenti, Elbasy Nursultan Ábishuly Nazarbaevtyń syndarly saiasaty men táýelsizdik jyldary elimizdiń jetken jetistikteri jaily keń turǵyda túsindirip, tárbie saǵaty retinde dáris ótkizedi. Elbasy sabaqtary ár túrli taqyryptardy qamtyǵan. Máselen, «Elbasynyń Otan jaily aitqandary», «Elbasynyń halyqtar dostyǵy men birligi jaily ulaǵattary», «Elbasynyń otbasy jaily aitqandary», «Elbasynyń el tarihy jaily aitqandary», «Elbasynyń ulttyq qaýipsizdik jaily bailamdary» jáne taǵy basqa Prezidentimizdiń asa ózekti tolǵam-oilary jaýyngerlik ujym músheleriniń rýhyn kóterý men shyńdaýǵa jolbasshy tárbie ózegi retinde alynǵan.
Alǵashqy sabaq Almaty qalasyndaǵy Ulttyq Ulannyń «Ońtústik» óńirlik qolbasshylyǵynda tárbieshi ofitserlermen jáne áskeri qoǵamdyq uiymdardyń ókilderimen ótkizildi. Shymyldyq ashar sabaqtyń taqyryby: «Elbasynyń til týraly jáne ulttyq kod jaily aitqan tolǵamdary» dep ataldy. Sabaq barysynda qazaq tiliniń latyn álipbiine aýysý máseleleri, elimizdegi úshtildilik saiasaty men qazaq tiliniń ulttyq kody men qazaq halqynyń mádenietin saqtaýdaǵy airyqsha róli keńinen aityldy.
Sondai-aq, shara barysynda Elbasynyń memlekettik til jáne shet tilder jaily aitqan oi-tolǵamdary basylǵan beine-aýdio jazbalar tyńdarman nazaryna usynyldy.
– Elbasy halqymyzdyń arqa súier alyp tulǵasy, taý tuǵyry. Nursultan Ábishuly Nazarbaevtyń osy ýaqytqa deiingi atqaryp jatqan tolaǵai isterine barshamyz kýágermiz. Halqyn sheksiz súiip, eliniń bir qajetine jarasam dep tynym tappai júrgen óz ultynyń asyl perzenti, Elbasymyzdyń arqasynda shirek ǵasyr ýaqytynyń ishinde elimiz jarqyn damý jolynan ótti. Kezinde arman bolǵan igi isterimiz júzege asyp otyr. Qazaq halqy ózge eldermen terezesi teń, keregesi keń turǵyda damyp, órkendep keledi. Bul eldiń mańdaiyna bitken baq. Elbasynyń osy ýaqytqa deiin aityp kele jatqan oi-tolǵamdary úlken tárbielik mánge ie. Ózderińiz biletindei, Tuńǵysh Prezidentimiz alýan taqyryptarda ár jiyn, keńesterde, óziniń jazǵan kitaptarynda, maqalalarynda úlken keleli oilar, elimizdi jarqyn bolashaqqa bastar baǵdarlardy kórsetip keledi. Máselen, til, shekara, ulttyq qaýipsizdik, iadrolyq qarýlanýdyń adamzatqa qateri, ultaralyq dostyq, Otan, týǵan jer, ult, taǵy da kóptegen taqyryptarda aitqan oilary jeke azamatty da, ujymdardy da tárbieleýge paidalanylar tunyp turǵan qainar kóz. Mine, biz osyny eskerip, endigi kezekte Elbasynyń sózderin dáiekke ala otyryp, jeke quramdy tárbielemekpiz. Elbasynyń aitqan ár taqyryptaǵy oilary bir, bir saǵat bolyp jiktelip, mamandarymyzben muraǵattan alynǵan beinejazbalarymen dáiektelip, jeke quramǵa usynylatyn bolady, – deidi «Ońtústik» óńirlik qolbasshylyǵy qolbasshysynyń tárbie jáne áleýmettik-quqyqtyq jumystar jónindegi orynbasary polkovnik Sabyrjan Súleimenov.
Jobany uiymdastyrýshylar, tárbielik-tanymdyq sabaqtardyń basty maqsaty – Otan qorǵaýshylardy eldi súiýge, halyqqa, Elbasyna qaltqysyz qyzmet etýge tárbieleý, áskeri qyzmetshilerdiń qoǵamdyq-azamattyq ómirge belsendi aralasýyna septesý, tulǵalar boiynda sheshendik ónerdi damytý ekenin aitady.
Arman OKTIaBR
