Almatyda Ulttyq ulannyń áskeri qyzmetshisi kóz jumdy, dep habarlaidy "Ult aqparat" «Ońtústik» Óńirlik qolbasshylyǵynyń baspasóz qyzmetine silteme jasap.
"22 tamyzda saǵat 15:15 shamasynda, qyzmettik mindetin oryndaý kezinde 2001 jyly týǵan kelisimshart boiynsha áskeri qyzmetshi Sabyrov Abylai Berikuly 3650 áskeri bóliminde (Almaty qalasy) ózine bekitilgen tapanshamen óz-ózin atyp, alǵan jaraqatynan qaitys boldy", - delingen habarlamada.
Qazir quqyq qorǵaý organdary tergeý jumystaryn júrgizip jatyr. Bolǵan oqiǵanyń sebepteri men mán-jaiyn anyqtaý úshin qyzmettik tergeý júrgiziledi.
"Ulttyq ulannyń bas qolbasshylyǵy men "Ońtústik" óńirlik qolbasshylyǵy áskeri qyzmetshi Abylai Sabyrovtyń týǵan-týystary men jaqyndaryna qaiǵyryp kóńil aitady", - dep atap ótti vedomstvo.
Ózge málimetter tergeý múddesi úshin jariia etilmeidi.
