Foto: gov.kz
Sybailas jemqorlyqqa qarys is-qimyl agenttiginiń Astana qalasy boiynsha departamenti "QR Densaýlyq saqtaý ministrligi Sanitarlyq-epidemiologiialyq baqylaý Komitetiniń Ulttyq saraptama ortalyǵy" Jetisý filialynyń direktoryna qatysty sotqa deiingi tergeý júrgizip jatyr, dep habarlaidy "Ult aqparat".
Antikor málimetinshe, ol Ulttyq ortalyq basshylyǵyna Almaty oblysyna qyzmetke aýysqany úshin 2 500 AQSh dollary kóleminde para berdi degen kúdikke ilinip otyr.
"Atalǵan adamnyń is-áreketiniń saralanýy prokýratýramen kelisilgen.
2023 jyly 31 naýryzynda sottyń sanktsiiasymen kúdikti qamaýǵa alyndy. Tergeý jalǵasyp jatyr. QPK-niń 201-babyna sáikes tergeý múddesi úshin ózge aqparat jariia etýge jatpaidy.
Sonymen birge, Konstitýtsiianyń 77-baby 3-tarmaǵynyń 1-tarmaqshasyna jáne Qylmystyq-protsestik Kodeksiniń 19-baby 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árbir adam kinásiz dep esepteledi, - delingen habarlamada.
Sondai-aq vedomstvo 12 mamyrda Astanada kúdiktiniń týystary men dostarynyń sanktsiialanǵan mitingi ótkenin atap ótti. Jinalǵandar onyń kinásizdigi týraly málimdep, obektivti tergeýdi talap etken.
