Ekologiia, geologiia jáne tabiǵi resýrstar ministri Maǵzum Myrzaǵaliev Qazaqstandaǵy ekologiialyq týrizmdi damytý josparyn jariialady, dep habarlaidy QazAqparat.
«Týrizmdegi órkenietsiz kózqaras bizdiń tabiǵatymyzǵa, biregei tabiǵi obektilerimizge keri yqpalyn tigizedi. Barlyǵymyz buǵan san ret kóz jetkizdik. Sondyqtan ekologiialyq, uiymdastyrylǵan týrizmdi damytý qajet. Al Qazaqstanda ekotýrizmniń áleýeti zor», - dedi ministr OKQ-da ótken baspasóz máslihatynda.
Maǵzum Myrzaǵalievtyń Memleket basshysynyń el ishindegi ekologiialyq týrizm mádenietin belsendi damytýdyń mańyzdylyǵyn atap ótkenin eske saldy. Jumys bastalyp ta ketken. Qazirgi ýaqytta Qazaqstanda 13 ulttyq park bar.
2019 jyly kelýshiler sany 1,5 mln adamǵa jetken. Búgingi kúni ulttyq parkterde kólik úshin jabdyqtalǵan turaqtar, kempingter, jańa sanitarlyq kabinalar múlde jetkiliksiz.
«Biz halyqaralyq tájiribeni esepke ala otyryp, negizgi nazardy marshrýttar men soqpaqtardy damytýǵa jáne jabdyqtaýǵa aýdaramyz. Zamanǵa sai vizit-ortalyqtar, meditsinalyq pýnktter, kempingter, etno-aýyldar qurylady. Osyǵan bailanysty, tiisti master-josparlar ázirlenýde. Ol sharýalar jurtshylyqpen talqylanýda. Qabyldanatyn sheshimderdiń ashyqtyǵyn qamtamasyz etý maqsatynda ulttyq parkter janynda Qoǵamdyq keńester quryldy. Almaty tobynyń Ulttyq parkterinde: Ile Alataýy, Sharyn, «Altyn Emel» jáne «Kólsai kólderinde» ekotýrizmdi damytý kontseptsiialary ázirlenip, olardyń prezentatsiialary ótkizildi», - dedi ol.
Ministr odan basqa qalǵan barlyq ulttyq parkte ekotýrizmdi damytý boiynsha tiisti kontseptsiialar ázirlenip jatqanyn baian etti.
«Ministrlik Birikken Ulttar uiymynyń damý baǵdarlamasymen birlesip erekshe qorǵalatyn tabiǵi aýmaqtardyń týristik marshrýttarǵa jáne ekologiialyq joldarǵa rekreatsiialyq júktemeni anyqtaý jóninde ádistemelik usynymdar ázirlep jatyr. Jalpy erekshe qorǵalatyn tabiǵi aýmaqtarda ekologiialyq týrizmniń damýy, eń bastysy, el azamattarynyń tabiǵatty qorǵaýǵa, týristterge qaýipsiz jáne qolaily jaǵdai jasaýǵa, jergilikti turǵyndardy qyzmet kórsetý salasyndaǵy jańa jumys oryndarymen qamtamasyz etýge múmkindik beredi», - dedi Maǵzum Myrzaǵaliev.
