Elimizde tuńǵysh «Ulttyq óner» fakýlteti ashyldy. Ashylý saltanatynda QR Eńbek sińirgen qairatkeri Ramazan Stamǵaziev Aqan seriniń ózi qoldanǵan dombyrasymen avtordyń ánderin oryndady.
T.Júrgenov atyndaǵy Qazaq ulttyq óner akademiiasynda elimizde tuńǵysh ret qurylǵan «Ulttyq óner» fakýltetiniń ashylý saltanaty ótti.
Elbasy N.Á.Nazarbaevtyń «Uly dalanyń jeti qyry» baǵdarlamalyq maqalasyn iske asyrý aiasynda halqymyzdyń rýhani qundylyqtary men tamyry tereńde jatqan ulttyq mádenietin órkendetý maqsatynda qolǵa alynǵan fakýltettiń ashylýyna mádeniet jáne óner ardagerleri professor, akademik Pernebek Momynov, Qazaqstannyń Halyq ártisi Sara Tynyshtyǵulova, Qurmanǵazy orkestriniń direktory Nurǵisa Daýeshov, "Otyrar sazy" orkestriniń kórkemdik jetekshisi Dinzýxra Tlendieva, Ulttyq ýniversitettiń basshylary men ustazdar qatysty.
Saltanatty sharany quttyqtaý sózben ashqan T.Júrgenov atyndaǵy qazaq ulttyq óner akademiiasynyń rektory Ashat Maemirov aitýly bastama ulttyq mádeniet keńistigindegi eleýli oqiǵa ekendigin jetkizdi.
«Elbasy N.Nazarbaevtyń «Uly dalanyń jeti qyry» maqalasynda ultqa qyzmet etý joldarynyń búkil mehanizmderi kórsetilgen. Sol kóterilgen maqsat mindetterdi júzege asyrý úshin osy fakýltetti ashý qajettiligi týyndady. Aldaǵy ýaqytta bilim uiasy qabyrǵasynan túlegen jas mamandar ulttyq ónerimizdi dáripteý baǵytynda jańa qyrynan kórinetini sózsiz», - degen Ashat Maksimuly elimizdiń mádenietine, óneri men rýhaniiatyna sarabdal saiasaty jáne máni tereń baǵdarlamalyq maqalalary arqyly serpin bergen Elbasy Nursultan Ábishulyna alǵys aitty.
Shara barysynda Qazaqstannyń eńbek sińirgen qairatkeri, T.Júrgenov atyndaǵy Qazaq ulttyq óner akademiiasynyń professory Pernebek Momynuly da aitýly bastamanyń tanymy keń, máni tereń ekenin sóz etti.
- Jańadan ashylyp jatqan bul «Ulttyq óner» fakýlteti el mádenieti, ónerdiń mereii úshin aitýly oqiǵa. Jastar jylynda jastarǵa jol ashyp jatqandaryńyzǵa dán rizamyn. Bul qazaq ónerin búkil álemge pash etýge arnalǵan úlken múmkindik. Aqan, Birjandardyń ónerin jalǵaityn daryndy jastardyń sanyn arttyryp, qazaq óneriniń óshpes juldyzyn jarqyrata beretinine senim mol,- dedi Pernebek Momynuly.
Búginde «Dástúrli mýzykalyq óner» men «Sándik-qoldanbaly óner» kafedralarynyń túlekteri el mádenietin álemge áigilep, halyqaralyq, respýblikalyq óner dodalarynda top jaryp júrgeni belgili. Jańa qurylǵan ulttyq óner kafedrasynda qazaq óneriniń maqtanyshyna ainalǵan P.Momynov, R.Stamǵaziev, N.Janpeisov, M.Abýǵazy, T.Muqyshev, S.Bapanova, R.Bazarbaeva, E.Daýbaev syndy kásibi mamandar dáris bermek.
Shákirt boiyna ulttyq óner tamyryn tereńdei sińirip, boiamasyz qadir-qasietin sharyqtatýǵa arnalǵan aitýly jiynda Qazaqstannyń eńbek sińirgen ártisi, «Dástúrli mýzykalyq óner» kafedrasynyń meńgerýshisi Ramazan Stamǵaziev Aqan seriniń ózi qoldanǵan dombyrasymen avtordyń ánderin oryndap, rýhyna taǵzym jasady.
Sonymen qatar, Mádeniet jáne sport ministri, IýNESKO isteri jónindegi ulttyq komissiianyń tóraǵasy Arystanbek Muhamediulynyń kelisimimen atalǵan oqý ornynda «IýNESKO» kafedrasyn ashý kózdelýde. Búgingi tańda, elimizdegi eki joǵary oqý ornynda arheologiialyq jumystardy iske asyrýdy kózdeitin «IýNESKO» kafedralary bar. Al, biylǵy jylǵa josparlanǵan joba materialdyq emes ultymyzdyń mýzykalyq muralaryn, basqa da jádigerlerin halyqaralyq arenaǵa shyǵarý maqsatynda júzege aspaq.
