Mádeniet jáne sport ministrligine qarasty dene shynyqtyrý jáne sport isteri jónindegi komitet Ulttyq Olimpiada komitetimen aradaǵy kelisimshartty toqtatady. Bul aqparatty komitettiń baspasóz qyzmeti rastady, dep habarlaidy Sputnik Qazaqstan.
Kelisimshartty buzý týraly qujatqa komitet tóraǵasy Samat Erǵaliev qol qoiyp, Qazaqstannyń Ulttyq Olimpiada komitetine jibergen. Eki jaqty shartty toqtatý týraly sheshim prezident Qasym-Jomart Toqaevtyń tapsyrmasy boiynsha qabyldandy.
Qujatqa sáikes, kelisimshartty buzý datasyna deiingi shyǵyndar komitettiń esebinen óteledi. Sonyń ishinde UOK qyzmetkerleriniń jalaqysy, keńseler men qoimalardy jalǵa alý aqysy, bank qyzmetteri, federatsiianyń servistik qyzmetteri jáne basqa jerde uiymdastyrylǵan sharalar bar. Bunyń barlyǵy qańtar-naýryz ailary boiynsha qarjylyq jáne sporttyq kúntizbege kiredi.
"Basqa shyǵyndar qarjylandyrýǵa jatpaidy", – delingen qujatta.
Búginde komitet kelisimshart boiynsha UOK-qa 800 million teńgeni avans retinde aýdaryp bergen. Qalǵan aqsha atqarylǵan jumystar týraly aktiler túskennen keiin aýdarylady. Osylaisha, 1 sáýirden bastap Ulttyq Olimpiada komiteti sportqa bólinetin memlekettik qarjyǵa ielik etpeidi.
Aita keteri, Tuńǵysh Prezidenttiń kúieý balasy Timýr Qulybaev Ulttyq Olimpiada komitetiniń prezidenti qyzmetin atqarady. Buǵan deiin ol "Atameken" ulttyq kásipkerler palatasynyń prezidiým tóraǵasy ókilettiligin óz erkimen tapsyrǵan bolatyn.
