Elordadaǵy Ulttyq mýzei 2015 jyly «Ulttyq mýzeige syi tartý» atty aktsiiany bastaǵan bolatyn. Maqsaty – qarapaiym halyqtyń qolyndaǵy mýzeilik mańyzy bar jádigerlerdi qorǵa alyp, talapqa sai saqtaý, ekpozitsiiaǵa qoiyp kelýshilerdiń nazaryna usyný. Búginge deiin osy aktsiia nátijesinde Ulttyq mýzeidiń qanjyǵasyna 3000-ǵa jýyq jádiger bailansa, solardyń bylǵarysy balzamdalyp, qaǵazy qaptalyp, aǵashy keptirilip mólsherden artyq jylý, jaryq hám jel timeitin qorlarǵa qoiyldy. Osyndaida shelektegi qatyqtyń betine toń mai quiyp, qazyny unǵa, sábizdi qumǵa tyǵyp saqtap jatatyn ájelerimiz elesteidi kózge.
«Ulttyq mýzeige syi tartý» aktsiiasy barysynda jinalyp, mýzeidiń qorynan oryn alǵan jádigerlerdiń qatarynda el tarihy úshin baǵasy artyq, quny ólsheýsiz Kenen Ázirbaevtyń dombyrasy men quran kitaby, Shámshi Qaldaiaqovqa 1965 jylǵy 4 aqpanda Shymkent oblysynyń jastary syiǵa tartqan «Kýban» pianinosy men sazgerdiń qarakól bórigi, Ázilhan Nurshaiyqovtyń «Nikon» fotoapparaty, Ermek Serkebaevtyń 70 jyldyǵyna N.Nazarbaev syilaǵan qol saǵaty, Ózbegáli Jánibekovtiń «Tsenzor» qaishysy, Madina Eralievanyń baiany, Jumeken Nájmedenovtiń kúlsalǵyshy, Roza Baǵlanovanyń sahnalyq kóilegi bar. Mýzei qoryna alynǵan osynaý jádigerlerdiń barlyǵy arnaiy mamandardyń súzgisinen ótip, suryptaldy, qajet dep tabylǵany mýzei restovratorlarynyń sheberhanasynda qalpyna keltirildi. Óńdeýden ótken jádigerler ekpozitsiiaǵa qoiyldy. Mýzeige kelgen meimandar osynaý jádigerlerdi de tamashalap júr.
Kúlli qazaq dalasyndaǵy qundy jádigerlerdi jinaýdy maqsat tutqan Ulttyq mýzei 2017 jylǵy 25 qyrkúiekte Soltústik Qazaqstan oblysynyń ortalyǵy Petropavl qalasynda da «Ulttyq mýzeige syi tartý» aktsiiasyn ótkizdi. Qyzyljar óńirinde ótken aktsiiada Qojabergen jyraý, Shal aqyn, Toqsan bi Jabaiuly, Maǵjan Jumabaev syndy aqyn-jyraý, bi-sheshenderge arnalǵan kitaptar, olardyń fotosýretteri, Shoqan Ýálihanovtyń ájesi Aiǵanymnyń qystaýynda qoldanylǵan as úi tegenesi mýzei qoryna alyndy. Petropavlda ótken aktsiiaǵa barlyǵy 21 adam qatysyp 236 jádigerdi Ulttyq mýzeige tabystady.
«Ulttyq mýzeige syi tartý» aktsiiasy uiymdastyrylǵan Almaty, Qyzylorda, Aqtóbe, Shymkent, Qostanai Oral qalalarynyń qataryna Qyzyljar óńiri de qosyldy. Aldaǵy ýaqytta elimizdiń ózge óńirlerinde de bul aktsiia ótkiziletin bolady.
Talapqa sai saqtamasaq kez-kelgen jádiger, ary ketkende, bir ǵasyrdyń ǵana kýási bola alady. Halqymyzdyń keshegi tarihynan tálim alyp, máiekti muralardy keleshekke amanattaimyz desek murany saqtaýǵa erekshe mán berýimiz kerek. Mýzeiler men arnaiy oryndarda saqtalǵan jádigerler ǵana máńgi jasaidy.
Dosjan SQAQOV
QR Ulttyq mýzeiiniń qyzmetkeri
