Elordada jańa kórme ashyldy. Oǵan ortaǵasyr jáne jańa zamandaǵy Qazaqstan tarihyna jatatyn qundy ári sirek kezdesetin qoljazbalar qoiylǵan, dep habarlaidy QazAqparat tilshisi.
«Búgin tól tarihymyzdy nasihattaý jolynda asa mańyzdy shara ótip otyr. Kóne jazba muralar tamyry tereń tarihymyzdy aishyqtap, kópshilikke dáripteidi. Ult rýhaniiatyn odan ári nyǵaityp jas urpaqqa jol ashady. Osy rette biz ulttyq mýzeide qoljazbalar jáne sirek kitaptar ulttyq ortalyǵyndaǵy biregei jazba derekterden arnaiy kórme uiymdastyryp otyrmyz. Maqsat – tarihi muralardy keleshekpen ózara bailanystyrý, elimizdiń sanǵasyrlyq tarihyn aiqyndaityn baǵa jetpes muralarymyzdy tanytý. Sonymen qatar ony ǵylymi ainalymǵa qosýymyz kerek. Kórmede el tarihyna qatysty birneshe mańyzdy jazba qoiylǵan. Atap aitsaq, VII ǵasyrda jazylǵan Quran men Qoja Ahmet Iassaýidiń, Mahmýdidyń, Ibn Halifa jáne basqa tanymal tulǵalardyń shyǵarmalary bar», - dedi QR Mádeniet jáne sport ministri Dáýren Abaev kórmeniń ashylý saltanatynda.
Ministrdiń aitýynsha, atalǵan qundy qoljazbalar - ultymyzdyń álemdik órkeniettiń damýyna qosqan úlesi.
Sondai-aq, olar jahandyq tarihta Uly dalanyń ornyn anyqtaýda mańyzdy ról atqarady.
«Aldymen osyndai aýqymdy, mańyzdy sharanyń bizdiń mýzeide ótip jatqany qýantady. Týǵan jerimizden kóptegen qundy jádigerlerdiń tabylǵany aian. Tarihtan belgili, Altyn adamdy ashqan kezde qasynan altyn tostaǵan tabyldy. Sol tostaǵan syrtyndaǵy jazý - kóne túrki jazbasynyń kýási. Sonymen qatar kúlli túrki álemine tanymal Kúltegin eskertkishin de bárińiz bilesizder», - deidi QR Ulttyq mýzeiiniń direktory Arystanbek Muhamediuly.
Uly dala tarihynyń jazba muralary» atty kórmege Qaiyp hannyń túrik sultany II Ahmedke jazǵan hatynan úzindi, sultan Kenesary, Jáńgir han, sultan Aitóre Aishýaq, Abylai hannyń hattary jáne taǵy basqa qundy jádigerler qoiylǵan.
Ulttyq mýzeide ashylǵan kórmeni elorda jurtshylyǵy jyl sońyna deiin tamashalai alady.
