ەلوردادا جاڭا كٶرمە اشىلدى. وعان ورتاعاسىر جەنە جاڭا زامانداعى قازاقستان تاريحىنا جاتاتىن قۇندى ەرٸ سيرەك كەزدەسەتٸن قولجازبالار قويىلعان, دەپ حابارلايدى قازاقپارات تٸلشٸسٸ.
«بٷگٸن تٶل تاريحىمىزدى ناسيحاتتاۋ جولىندا اسا ماڭىزدى شارا ٶتٸپ وتىر. كٶنە جازبا مۇرالار تامىرى تەرەڭ تاريحىمىزدى ايشىقتاپ, كٶپشٸلٸككە دەرٸپتەيدٸ. ۇلت رۋحانيياتىن ودان ەرٸ نىعايتىپ جاس ۇرپاققا جول اشادى. وسى رەتتە بٸز ۇلتتىق مۋزەيدە قولجازبالار جەنە سيرەك كٸتاپتار ۇلتتىق ورتالىعىنداعى بٸرەگەي جازبا دەرەكتەردەن ارنايى كٶرمە ۇيىمداستىرىپ وتىرمىز. ماقسات – تاريحي مۇرالاردى كەلەشەكپەن ٶزارا بايلانىستىرۋ, ەلٸمٸزدٸڭ سانعاسىرلىق تاريحىن ايقىندايتىن باعا جەتپەس مۇرالارىمىزدى تانىتۋ. سونىمەن قاتار ونى عىلىمي اينالىمعا قوسۋىمىز كەرەك. كٶرمەدە ەل تاريحىنا قاتىستى بٸرنەشە ماڭىزدى جازبا قويىلعان. اتاپ ايتساق, VII عاسىردا جازىلعان قۇران مەن قوجا احمەت ياسساۋيدٸڭ, ماحمۋديدىڭ, يبن حاليفا جەنە باسقا تانىمال تۇلعالاردىڭ شىعارمالارى بار», - دەدٸ قر مەدەنيەت جەنە سپورت مينيسترٸ دەۋرەن اباەۆ كٶرمەنٸڭ اشىلۋ سالتاناتىندا.
مينيستردٸڭ ايتۋىنشا, اتالعان قۇندى قولجازبالار - ۇلتىمىزدىڭ ەلەمدٸك ٶركەنيەتتٸڭ دامۋىنا قوسقان ٷلەسٸ.
سونداي-اق, ولار جاھاندىق تاريحتا ۇلى دالانىڭ ورنىن انىقتاۋدا ماڭىزدى رٶل اتقارادى.
«الدىمەن وسىنداي اۋقىمدى, ماڭىزدى شارانىڭ بٸزدٸڭ مۋزەيدە ٶتٸپ جاتقانى قۋانتادى. تۋعان جەرٸمٸزدەن كٶپتەگەن قۇندى جەدٸگەرلەردٸڭ تابىلعانى ايان. تاريحتان بەلگٸلٸ, التىن ادامدى اشقان كەزدە قاسىنان التىن توستاعان تابىلدى. سول توستاعان سىرتىنداعى جازۋ - كٶنە تٷركٸ جازباسىنىڭ كۋەسٸ. سونىمەن قاتار كٷللٸ تٷركٸ ەلەمٸنە تانىمال كٷلتەگٸن ەسكەرتكٸشٸن دە بەرٸڭٸز بٸلەسٸزدەر», - دەيدٸ قر ۇلتتىق مۋزەيٸنٸڭ ديرەكتورى ارىستانبەك مۇحامەديۇلى.
ۇلى دالا تاريحىنىڭ جازبا مۇرالارى» اتتى كٶرمەگە قايىپ حاننىڭ تٷرٸك سۇلتانى ٸٸ احمەدكە جازعان حاتىنان ٷزٸندٸ, سۇلتان كەنەسارى, جەڭگٸر حان, سۇلتان ايتٶرە ايشۋاق, ابىلاي حاننىڭ حاتتارى جەنە تاعى باسقا قۇندى جەدٸگەرلەر قويىلعان.
ۇلتتىق مۋزەيدە اشىلعان كٶرمەنٸ ەلوردا جۇرتشىلىعى جىل سوڭىنا دەيٸن تاماشالاي الادى.
