Memlekettik keńesshi Erlan Qarin youtube kanalynda Ulttyq quryltai negizge alatyn úsh qundylyqty atady, dep habarlaidy QazAqparat.
«Ulttyq quryltaidyń jasaqtalýynda, onyń ótken orny men ýaqytynda birqatar ideologiialyq tujyrymdardy qamtityn oi bar.
Birinshi oi – bizdiń memlekettigimizdiń tarihy tym tereńde. Quryltaidyń Joshy han kesenesi irgesinde ótkizilýinde erekshe mán jatyr. Bizdiń memlekettigimizdiń tarihy Altyn Ordadan bastaý alyp, Qazaq handyǵy dáýirinde qalyptasyp, Alash Orda kezeńinde jalǵasyp, Táýelsizdik Qazaqstan tusynda qaita jańǵyrdy.
Ekinshi oi – ultty uiysýǵa úndeý. Quryltaidyń birinshi otyrysy Ulytaýda ótti. Ekinshi jiyn Túrkistanda bolady. Bul halqymyz úshin kieli jerler. Sondyqtan munda barsha halqymyzdy birlikke shaqyrǵan ideologiialyq oi bar. Quryltaidyń dál osy ýaqytta ótýi dep beker emes. Keleli jiyn el damýynyń jańa baǵytyn aiqyndaǵan jáne ulttyń uiysýynyń jańa deńgeige kóterilgenin kórsetken jalpyhalyqtyq referendýmnan keiin ótti.
Úshinshi oi – memleket múddesi bárinen biik. Respýblika kúnin qaita jańǵyrtyp, oǵan memlekettik mártebesiniń berilýi – Táýelsizdik ideiasymen memlekettik qundylyqtardy berik ornyqtyra túsýge baǵyttalǵan. Osy úsh qundylyq jańa qoǵamdyq shartty qalyptastyrý kezinde bizdiń eń basty baǵdarymyz bolady», – dep atap ótti Erlan Qarin.
Sonymen qatar Memlekettik keńesshi zań ústemdigin qamtamasyz etýge, pikir alýandylyǵyn qoldaýǵa jáne mańyzdy memlekettik sheshimder qabyldaityn ýaqytta qoǵamnyń pikirin eskerýge elimiz daiyn ekenin atap ótti.
