Ulttyq quryltaidyń qurylýy «halyq únine qulaq asatyn memleket» tujyrymdamasyn júzege asyrýda mańyzdy kezeń bolyp otyr. Bul týraly QR Aqparat jáne qoǵamdyq damý vitse-ministri Daniiar Qadyrov málim etti, habarlaidy QazAqparat.
«Ministrlik qoǵamdyq keńesterdiń qyzmetin jetildirý jáne quramyn jańartý jónindegi jumysty jalǵastyratyn bolady. Qazirgi ýaqytta 102 qoǵamdyq keńes qurylǵan, 111-i qalyptasý barysynda. Sonymen qatar, jańartylǵan quramdardy qalyptastyrý kezinde belsendi ÚEU-lar ókilderin, partiialar men azamattyq institýttardy barynsha tartý usynylady», - dedi D. Qadyrov Qazaqstannyń Azamattyq aliansy alańynda Joldaýdy talqylaý kezinde.
Onyń sózine qaraǵanda, biyl alǵash ret Qazaqstan Respýblikasyndaǵy qoǵamdyq keńesterdiń qyzmeti týraly Ulttyq baiandama daiyndalady. Onda qoǵamdyq keńester jumysynyń tiimdiligine jáne onyń odan ári damýy perspektivalaryna taldaý jasalatyn bolady.
Osyǵan qosa, birinshiden, memlekettik áleýmettik tapsyrys júiesi arqyly ÚEU jobalaryn josparlaý tásili qaita saraptalady. Máselen, qazirgi tańda Parlamentte tiisti zań jobasy qaralýda, ol ÚEU-ny memlekettik qoldaýdyń sapasy men ashyqtyǵyn aitarlyqtai dárejede jaqsartatyny anyq.
«Ekinshiden, eldi damytýdyń ózekti mindetteri men máselelerin sheshý úshin belsendi azamattardy tartý maqsatynda múddeli memlekettik organdarmen birlesip, ÚEU-ny onyń barlyq kezeńderinde memlekettik sheshimder qabyldaý protsesine tartý tetikteri jetildiriletin bolady. Árbir sheshimge tyńǵylyqty taldaý jasalady. Úshinshiden, Parlament qabyrǵasynda azamattar men memlekettiń ózara is-qimylynyń sapaly jańa qaǵidattaryn qalyptastyratyn «Qoǵamdyq baqylaý týraly» Zań jobasy talqylanýda», - dedi vitse-ministr.
Onyń paiymynsha, Ulttyq quryltaidyń qurylýy ashyq qoǵamdy qalyptastyrýda jáne «halyq únine qulaq asatyn memleket» tujyrymdamasyn júzege asyrýda mańyzdy kezeń bolyp otyr. Ulttyq quryltai jumysyna azamattyq qoǵam ókilderi keńinen jumyldyrylady. Osy oraida elimizdiń barlyq óńirinen túrli baǵyttar boiynsha qamtylady.
Aita keteiik, Memleket basshysy biylǵy Joldaýynda Ulttyq qoǵamdyq senim keńesi óz mindetin tabysty atqarǵanyn aita kele, endi onyń ornyna quramy jaǵynan aýqymdy Ulttyq quryltai qurýdy usyndy.
«Ulttyq quryltaidyń quramynda elimizdegi barlyq aimaqtyń ókilderi bolady. Sondai-aq, oǵan Parlamenttiń birqatar depýtaty, Qazaqstan halqy Assambleiasy men Azamattyq alianstyń, qoǵamdyq keńester men uiymdardyń músheleri, bedeldi qoǵam qairatkerleri, óndiris jáne aýyl sharýashylyǵy jumysshylary, biznes ókilderi jáne taǵy basqa azamattar kiredi», - dedi Qasym-Jomart Toqaev.
