Ulttyq quryltai bul negizgi ókilettik fýnktsiiasyn júzege asyratyn institýtsionaldy alańǵa ainalady. Bul týraly «Ulttyq quryltai – qoǵamdyq dialogtyń jańa modeli» atty «Sarap» eksperttik klýbynyń otyrysynda Májilis depýtaty Saiasat Nurbek málim etti, dep habarlaidy QazAqparat.
«Memleket basshysy óz Joldaýynda naqty usynystar jasady. Sońǵy 10 jylda saiasi júieniń sezgishtigin joǵaltyp aldyq. Ekinshiden, saiasi júieniń tepe-teńdiginen aiyryldyq. Sondyqtan halyqpen tikelei jumys isteitin, iaǵni máslihattar men Parlament Májilisi ekeni túsinikti. Biraq bul fýnktsiia álsirep ketkennen keiin, onyń ornyna osyndai birneshe organ jasaýǵa týra keldi. Bilik ony 10 jylda sezindi, biz halyqpen tikelei bailanysty joǵaltyp jatyrmyz. Bul rette memlekettik organnyń janynan qoǵamdyq keńester paida boldy. Prezident 2019 jyly kelgende osynyń bárin jaqsy túsindi, iaǵni «halyqtyń únin qalai estimin» degen qaǵidatqa ekpin qoidy. Memlekettik organdar baiandamalar jazǵanda – bul málimetter birneshe súzgiden ótkiziledi. Osynyń bárin nazarǵa alyp, Ulttyq qoǵamdyq senim keńesi quryldy», - dedi ol.
Osy oraida ol Ulttyq keńes osy ýaqyt ishinde óziniń rólin atqara alǵanyn atap ótti.
«Úsh jyl boiy jumys istedik. Bizdiń sol kezdegi negizgi qyzmetimiz Prezidentke túrli áleýmettik toptardyń únin taza jetkizý boldy. Sol jetkizilgen aqparattarǵa, halyqtyń kókeiinde júrgen suraqtar men talaptarǵa kerekti jaýap qaitarý nazarǵa alyndy», - dedi depýtat.
«Endi Ulttyq quryltai nelikten áli kúnge deiin qajet ? Joldaýda úsh másele aityldy. Birinshiden, quryltai qoǵamdyq keri bailanystyń institýtsionaldyq alańy bolady. Ol búkil qurylǵan qoǵamdyq keńesterdi biriktiretin, bir jerge jinaqtaityn birkelki bilikpen, Prezidenpen halyqtyń arasyndaǵy bailanys. Ekinshiden, onyń quramyna depýtattar da, túrli salanyń ókilderi de kirýi kerek. Osy oraida búkil Qazaqstannyń atynan sóilei alatyn organ bolýy mańyzdy. Meniń oiymsha, bul ýaqytsha organ bolýy kerek. Sebebi, negizgi institýtsionaldy ózgeris - ol zań shyǵarýshy ókiletti biliktiń ózin qalpyna keltirý. Halyqtyń úni, halyqtyń ókileti, Konstitýtsiiamyz bekitken fýnktsiiasy – ol máslihattar, Májilis arqyly berilýi kerek. Biraq ony bir kúnde jasai almaimyz. Áli de Konstitýtsiianyń 30-dan astam babyna ózgeris engizý qajet jáne taǵy 20-dan astam zań qabyldaý kerek. Parlament Májilisiniń aldynda aýqymdy jumys tur. Osy ýaqytta Ulttyq quryltai bul negizgi ókilettik fýnktsiiasyn júzege asyratyn institýtsionaldy alańǵa ainalmaq», - dedi Saiasat Nurbek.
