Parlament Májilisiniń jalpy otyrysynda depýtat Azat Sembinov Premer-Ministrdiń orynbasary Álihan Smailovqa depýtattyq saýal joldap, onda ulttyq qordaǵy qarajat máselesin kóterdi, dep habarlaidy "Ult aqparat".
Depýtattyń aitýynsha, biylǵy biýdjetti naqtylaý kezinde, shyǵystardy óteýdiń negizgi kózderiniń biri – qaitadan ulttyq qordyń 850 mlrd teńge somasyndaǵy qarajaty boldy.
«Jalǵasyp jatqan «koronakrizis» jáne 10,6 % munaisyz biýdjettiń tapshylyǵy jaǵdaiynda bul sheshimdi maquldaýǵa májúr boldyq. Sonymen qatar, Ulttyq qordan alynǵan qarajat, elimizdiń bolashaq urpaqtarynyń nesibesin jep qoiýmen para-par. «Aq jol» fraktsiiasy birneshe ret Norvegiia munai qorynyń tájiribesine súienýge shaqyrǵan, iaǵni, aǵymdaǵy biýdjettik qarjylandyrýǵa investitsiialyq tabystyń belgili bir bóligi ǵana baǵyttalýy múmkin, al negizgi jinaqqa eshkim qol suǵa almaidy. Mysaly, aldyńǵy daǵdarystan keiin Norvegiia ózinniń munai qorynyń bar-joǵy 1-aq protsentin jumsaǵan. Al Qazaqstannyń ulttyq qorynan sol kezde 83 mlrd dollar jumsalǵan» dedi depýtat búgingi Májilis otyrysynda.
Onyń aitýynsha, 2001-2015 jyldary ulttyq qorǵa 147 mlrd dollar túsim túsken. Demek Qazaqstan búgingi daǵdarysqa deiin ulttyq qordyń jartysynan astamyn jumsap qoiǵan.
«Aq jol» fraktsiiasy elimizdiń bolashaq urpaqtarynyń igiligin ysyrap etýdi jónsiz dep sanaidy. Ásirese, bul shyǵyndar, aiaqtalmaǵan qurylys obektileriniń baǵalarynan bastap, oqýshylarǵa bólingen noýtbýkterdi urlaýǵa deiingi jemqorlyqpen bailanysty bolsa. Osy negizde «Aq jol» fraktsiiasynyń depýtattary ulttyq qordy saqtaý jáne ony jinaqtaý fýnktsiiasyn iske asyrý maqsatynda, aitylǵan kemshilikterdi eskere otyryp, Ulttyq qordy qalyptastyrý jáne paidalaný tujyrymdamasyn qaita qaraýdy usynady» dep atap ótti Azat Sembinov.
