«Astana FINANCE DAYS 2021» jyl saiynǵy konferentsiiasy aiasyndaǵy Qazaqstannyń ulttyq basymdyqtary taqyrybynda sessiia jumysy ótip jatyr, dep habarlaidy QazAqparat.
Talqylaýǵa QR Strategiialyq josparlaý jáne reformalar agenttiginiń tóraǵasy Qairat Kelimbetov, QR Prezidentiniń keńesshisi Sýma Chakrabarti, Ulttyq ekonomika birinshi vitse-ministri Timýr Jaqsylyqov, Qazaqstandaǵy EQDB ókildiginiń direktory Agris Preimanis qatysyp otyr.
«Qazirgi kezde barsha álemde koronavirýs pandemiiasyn eńserýge qatysty úkimetterdiń jumysyna taldaý júrgizilip jatyr dep oilaimyn. Menińshe, Qazaqstan týraly aitarlyqtai ońtaily baǵalaý bar. Birinshiden, álemde adamdardyń ómirin qutqarý, epidemiologiialyq qaterge jaýap berý, sondai-aq daǵdarys qubylystarymen kúresý baǵyttaryna kóńil bólindi. Munymen qosa, bolashaq ósimge jaǵdai jasaý da qarastyryldy», - dedi Qairat Kelimbetov.
Osy oraida ol byltyrdan beri elimizde atalǵan baǵyttarǵa qomaqty qarajat bólingenin eske saldy.
«Jalpy, Ulttyq qordan transfertter aiasynda «qaýipsizdik jastyǵy» kúrdeli kezeńde turaqtylyqty seziný úshin jaqsy múmkindikti qurǵanyn atap ótken jón», - dedi agenttik basshysy.
Onyń paiymynsha, pandemiia kezinde birqatar salada tosqaýyl bolǵanymen, Úkimet densaýlyq saqtaý, ekonomikalyq ósim salasynda baqylaýdy júrgizip keledi.
Birqatar elde vaktsinalaý qarqyny jaqsy júrgizilgenine toqtalǵan Q. Kelimbetov : «bul turǵyda ujymdyq immýnitetti qurýǵa ekpin qoiylǵan. Indettiń túrli mýtatsiialary shyqqanymen, osyndai qadamdar aýrýdyń taralýyn shektei alady. Meniń oiymsha, jasyl aimaqqa shyǵý ekonomikanyń ósimine oń áser etedi. Bul rette qyzmet kórsetý salasy keńinen iske qosylyp, shekteýler azaiady. Sondyqtan ujymdyq immýnitet turǵysynda Qazaqstan Úkimetinde jaqsy josparlar bar, vaktsinalaýdyń tiisti kestesi jasalǵan. Biz ony oryndasaq, pandemiiaǵa jaýap pen ornyqty ósim boiynsha Qazaqstan turaqty aimaqta bolady», - dedi.
