© Photo: Unsplash/Leo Rivas
"Ulttyq qor – balalarǵa" baǵdarlamasy aiasynda 18 jasqa tolmaǵan balalardyń arnaiy shotyna alǵashqy aqsha 2024 jyly 1 aqpanda túsedi. Bul týraly qarjy vitse-ministri Dáýren Temirbekov málimdedi, dep habarlaidy Sputnik Qazaqstan.
Ol "Ulttyq qor – balalarǵa" baǵdarlamasy kelesi jyly 1 qańtarda iske qosylatynyn atap ótti. Al bir aidan keiin kámeletke tolmaǵan balalardyń shotyna aqsha túse bastaidy.
"Alǵashqy tólemder 2024 jyly 1 aqpanda túsedi. Nege bulai? Bir balaǵa qansha soma aýdarylatynyn anyqtaý úshin esepteýler júrgizýge bir ai ýaqyt ketedi. Bul qarapaiym arifmetika: 18 jyl ishindegi investitsiialyq tabystyń 50%-i 18 jasqa deiingi balalardyń sanyna bólinedi. Osylaisha bir balaǵa beriletin soma anyqtalady. Bul aqsha kelesi jyldyń 1 aqpanynda aýdarylady", - dedi Temirbekov Ortalyq kommýnikatsiialar qyzmetinde ótken baspasóz máslihatynda.
Sondai-aq vitse-ministr ata-analar balalarynyń shotyna aqsha túsip-túspegenin qalai teksere alatynyn aitty.
"BJZQ saity arqyly baqylaýǵa bolady. JSN engizip, balaǵa qarajat aýdaryldy ma, joq pa, teksere alady. Al birneshe jyl ishindegi somany bilý úshin Egov-taǵy jeke kabinetke kirý kerek. Integratsiia boiynsha tiisti jumystar júrgizilip jatyr, jyl sońyna deiin aiaqtalady", - dep sendirdi Temirbekov.
Aita keteiik, qazaqstandyq balalar 18 jasqa tolǵannan keiin shottaǵy aqshany eki maqsatqa ǵana jumsai alady: baspana satyp alýǵa nemese oqý aqysyn tóleýge. Bul rette balalarǵa aqshany shetelde bilim alý úshin paidalanýǵa ruqsat etiledi.
