Ulttyq konkishiler federatsiiasy mánerlep syrǵanaýdan Qazaqstan chempionaty bekitilgen erejege sáikes 2022 jyldyń jeltoqsan aiynda ótetinin resmi túrde málim etti, dep habarlaidy QazAqparat.
«El chempionaty 2022 jyldyń jeltoqsan aiynda ótedi. Qatysýshylarǵa sharanyń ótetin orny men naqty kúni keiinirek aitylady»,- dep habarlady federatsiiadan.
Uiym málimetinshe, federatsiianyń vitse-prezidenti Oksana Ten 21-23 aqpan aralyǵynda Almatyda mánerlep syrǵanaýdan Qazaqstan chempionaty ótetini týraly óńirlerge jiberiletin jedelhatqa qol qoiǵan. Bul qujat búgingi kúni jaramsyz dep tanyldy.
«Federatsiia vitse-prezidentteriniń mórge qol qoiýǵa jáne paidalanýǵa, sondai-aq jeke sheshim qabyldaýǵa quqyǵy joq. Respýblikalyq jarystardy ótkizý týraly ereje sportshylardyń múddeleri men jattyqtyrýshylar quramynyń pikirin eskere otyryp, alqa jiynynda qaralady. Federatsiiamen kelisilip, Mádeniet jáne sport ministrligine bekitýge jiberiledi», - dep atap ótti Ulttyq konkishiler federatsiiasy.
Eske salaiyq, 11 aqpanda uiymnyń quryltai jinalysynyń qorytyndysy boiynsha vitse-prezidentter laýazymy joiyldy.
«Federatsiia reformalar men ózgeristerdiń ýaqyty kelgenine senimdi. Mánerlep syrǵanaý ár adam úshin naqty jaýapkershilik aimaqtary bar naqty sheshim qabyldaý júiesin qajet etedi. Komandada jumys istei alatyn, sportshylardyń daiyndyǵy men ósýin naqty qalyptastyratyn, qarjylandyrýdyń ashyq júiesi men ádil tórelik etetin tiimdi menedjerlerdiń ýaqyty keldi. Sonymen qatar, federatsiia O.A.Ten atqarǵan jumysy men mánerlep syrǵanaý sportynyń damýyna qosqan úlesi úshin alǵys aitady», - delingen UKF habarlamasynda.
