Aldaǵy ýaqytta biýdjet tapshylyǵy tek ishki resýrstardyń esebinen qarjylandyrylady. Bul týraly QR Parlamenti palatalarynyń birlesken otyrysynda QR Qarjy ministri Baqyt Sultanov málim etti, dep habarlaidy QazAqparat.
«Makroekonomikalyq turaqtylyqty jáne memleket qarjysynyń teńgerimdiligin qamtamasyz etý úshin 2016 jyly biýdjet saiasaty birqatar shekteýlerdiń negizinde qalyptasty. Osynyń biri - biýdjet tapshylyǵynyń kólemin baqylaý. Biýdjet tapshylyǵynyń mólsheri jospardaǵy kórsetkishten 161,5 mlrd. teńgege tómendep, 741 mlrd. teńgeni qurady. Eki palatanyń jumys toptarynda asa nazar aýdyrylyp talqylanǵan másele - memlekettik jáne kvazimemlekettik boryshtyń ósýi. Aldaǵy ýaqytta biýdjet tapshylyǵyn tek ishki resýrstardyń esebinen qarjylandyrýdy josparlaýdamyz. Holdingter men ulttyq kompaniialardyń syrttan qaryz alý operatsiialary Úkimetpen kelisiletin bolady. Boryshtyq júktemeniń qaýipsiz deńgeide bolýy árqashan qatań baqylaýda bolady», - dedi ministr.
Sonymen qatar, B. Sultanov biýdjettiń oryndalýyna qatysty Esepti qaraý kezinde depýtattar usynystarynyń mańyzy zor ekendigin jetkizdi.
«Osy jerde qozǵalǵan júieli máseleler bizge salyqtyq ákimshilendirýdegi, biýdjet protsesterindegi kemshilikterdi jetildirýge kómek bolady»,-dedi Qarjy ministri depýtattarǵa qaratyp aitqan sózinde.
