Qazaqstan Respýblikasy Prezidentiniń janyndaǵy «Rýhani jańǵyrý» baǵdarlamasyn iske asyrý jónindegi ulttyq komissiia otyrysy ótti, dep habarlaidy Aqordanyń baspasóz qyzmeti.
Memleket basshysy Qasym-Jomart Toqaevtyń Jarlyǵymen jańartylǵan Ulttyq komissiia quramyna Qazaqstan Respýblikasynyń Memlekettik hatshysy Marat Tájin jetekshilik etedi.
Komissiia otyrysynda «Rýhani jańǵyrý» baǵdarlamasy men Elbasynyń «Uly dalanyń jeti qyry» atty maqalasynyń iske asyrylý qorytyndylary, sonymen qatar jańa jobalardy júzege asyrý josparlary qaraldy.
Jiyndy ashqan Memlekettik hatshy Marat Tájin eki jyl ishinde qoǵamdyq jáne tarihi sanany jańǵyrtýdy basty maqsat etken aýqymdy jumys atqarylǵanyn atap ótti.
Latyn grafikasy negizindegi qazaq álipbii bekitildi. «Týǵan jer» jobasy aiasynda metsenattar qarajatyna 27 mektep, 115 balabaqsha, 479 áleýmettik infraqurylym nysany salyndy. Otandyq tarihta alǵash ret shet tilderden ekonomika, áleýmettaný, saiasattaný, psihologiia jáne ózge de ǵylym salalary boiynsha álemdegi 48 úzdik oqýlyq qazaq tiline aýdarylyp, basyp shyǵaryldy. Eldiń gýmanitarlyq bilim qory 2019 jyly taǵy 30 kitappen tolyqpaq. Sondai-aq BUU-nyń negizgi 6 (aǵylshyn, frantsýz, ispan, arab, qytai, orys) tilinde Qazaqstan jazýshylary men aqyndarynyń proza jáne poeziia antologiialary baspaǵa ázirlenip, osy jyly jaryq kóretin bolady. «Kieli Qazaqstan» jobasy tabysty júrgizilýde: 28 tarihi nysanda restavratsiia jasaldy, jańadan «Bozoq», «Botai», «Saraishyq» qoryq-mýzeileri ashyldy. Elbasynyń «Uly dalanyń jeti qyry» maqalasyndaǵy jobalar qyzý iske asyrylýda.
Júrgizilip jatqan jumystyń naqty nátijeleri men josparlary týraly otyrysta Qazaqstan Respýblikasy Prezidenti Ákimshiligi Memlekettik baqylaý jáne uiymdastyrý-aýmaqtyq jumysy bóliminiń meńgerýshisi Nurlan Saýranbaev, «Wikibilim» qoǵamdyq qory qamqorshylar keńesiniń tóraǵasy Raýan Kenjehanuly, Qazaqstan Respýblikasy Prezidenti Ákimshiligi Ishki saiasat bóliminiń meńgerýshisi Aida Balaeva, Nur-Sultan qalasynyń ákimi Baqyt Sultanov, Mádeniet jáne sport ministri Arystanbek Muhamediuly, Bilim jáne ǵylym ministri Kúlásh Shámshidinova, Aqparat jáne qoǵamdyq damý ministri Dáýren Abaev sóz sóiledi.
Memlekettik hatshy Marat Tájin «Rýhani jańǵyrý» baǵdarlamasyn ári qarai iske asyrý jumysyn jandandyrý qajettigin airyqsha atap aityp, birqatar tapsyrma berdi, olardyń oryndalýy Qazaqstan Respýblikasy Prezidenti Ákimshiliginiń tiisti bólimderi men Ulttyq komissiianyń udaiy baqylaýynda bolmaq.
.jpeg)