Foto: Abai.kz
QR Mádeniet jáne aqparat ministrligine qarasty Ulttyq kinony qoldaý memlekettik ortalyǵy tórt jańa animatsiialyq filmniń óndirisin bastady. Jobalar balalar men jasóspirimderge arnalǵan, dep habarlaidy Ult.kz.
Animatsiialyq filmder otandyq animatsiia salasyn damytýǵa, mádeni qundylyqtardy nasihattaýǵa jáne jas urpaqqa arnalǵan tárbielik, qyzyqty kontent usynýǵa baǵyttalǵan.
Ulttyq kino ortalyǵynyń Basqarma tóraǵasy Qurmanbek Jumaǵalidiń aitýynsha, animatsiia – balalar men jastardyń dúnietanymyn qalyptastyratyn mańyzdy qural. Ulttyq jobalardy qoldaý arqyly mádeni murany saqtap qana qoimai, jańa býyn avtorlaryna da jol ashatynyn aitty.
Memlekettik qoldaýǵa ie bolǵan jobalardyń biri – «Komanda A» atty shytyrman oqiǵaly animatsiialyq filmi. Filmde jasóspirim qyz ata-anasymen birge oiyn-saýyq planetasyna sapar shegip, bótenǵalamshardaǵy kúreske tap bolady. Bul – dostyq, otbasylyq qundylyqtar men meiirimdilikti dáripteitin oqiǵa.
Budan bólek «Báiterek týraly ańyz» atty debiýttik animatsiialyq filmi de ázirlenýde. Filmde Qyran esimdi jetim bala qasietti aǵash – Báiterekti saqtaý úshin siqyrly rýhtar álemine saiahat jasaidy. Ol óziniń shyǵý tegin zerttep, adamdar men rýhtar arasyndaǵy tepe-teńdikti saqtaýǵa tyrysady.
Jańa «Alan týraly ańyz» filmi de óndiriske jiberildi. Bul týyndyda zulym kúshter shabýyldaǵan beibit qalany qorǵaý úshin kúresken Alan esimdi batyrdyń erligi baiandalady. Film ádilet, batyldyq pen adaldyq sekildi qundylyqtardy nasihattaidy.
Tórtinshi joba – «Jibek» filmi. Bul film qazirgi Jibek jolynyń ideiasynan shabyt alǵan. Náreste kezinde aidahar qutqarǵan Jibek eseiip, joǵalǵan kerýendi izdeýge shyǵady. Ol týǵan dalasyna oralyp, qyz balanyń da batyr, kóshbasshy bola alatynyn dáleldeidi.
Atalmysh jobalar otandyq animatsiia salasyna jańa serpin berip, jas kórermenge sapaly ári mazmundy týyndylar usynady.
