Memleket basshysynyń Ulttyq keńestiń aiasynda aitylǵan bastamalaryn tiisti túrde júzege asyrý baqylaýǵa alyndy. Bul týraly Ulttyq qoǵamdyq senim keńesiniń tórtinshi otyrysynda QR Prezidentiniń kómekshisi Erlan Qarin málim etti, dep habarlaidy QazAqparat.
«Mamyr aiynda ótken Ulttyq keńestiń úshinshi otyrysynan keiin keńes aiasynda birneshe baǵytta aýqymdy jumys júrgizildi. Eń aldymen hatshylyq tarapynan Memleket basshysynyń Ulttyq keńestiń aiasynda aitylǵan bastamalaryn tiisti túrde júzege asyrý baqylaýǵa alyndy. Atap aitqanda, ekinshi otyrysta jariialanǵan saiasi-ekonomikalyq, áleýmettik reformalar paketterin júzege asyrylýy erekshe nazarǵa alyndy», - dedi E. Qarin.
Onyń sózine qaraǵanda, qazirgi kezde Ulttyq keńestiń aiasynda jariialanǵan saiasi reformalar paketi tolyq iske asyp, mamyr-maýysym ailarynda jeti zań qabyldandy. Bul zańdar kóp partiialy júieniń damýyna, saiasi partiialar mártebesiniń artýyna, jastar men áielderdiń ókiletti bilik organdaryna belsendi tartylýyna, adam quqyǵyn qorǵaýǵa septigin tigizedi.
«Sonymen birge qazirgi ýaqytta hatshylyq ekonomikalyq, áleýmettik reformalar paketiniń júzege asyrylýyn baqylaýda ustaýda. Máselen, ústimizdegi jyldyń 2 qazanynda Senatqa Qazaqstan Respýblikasynyń zańnamasyna sáikes, paidalanylmaityn aýyl sharýashylyǵy maqsatyndaǵy jerge jer salyǵynyń bazalyq mólsherlemelerin 10-nan 20 ese ulǵaitýdy qarastyratyn zań jobasy qaraýǵa engizildi. Sondai-aq, aýyl sharaýshylyǵy jerlerin paidalanbaý merzimin májbúrlep qaitarý úshin eki jyldan bir jylǵa qysqartý normasyn qamtityn zań jobasy jyl sońyna deiin Májilis qaraýyna ótkizilýi josparlanyp tur», - dedi Erlan Qarin.
