Halyqtyń áleýmettik jaǵdaiynyń ýshyǵýyna sebepker bolyp otyrǵan bankterdiń jumysyna saraptama júrgizý kerek. Bul týraly búgin Ulttyq qoǵamdyq senim keńesiniń tórtinshi otyrysynda keńes múshesi Lázzat Qojahmetova málim etti, dep habarlaidy QazAqparat.
Nesiesin tólei almai otyrǵan adamdar máselesine toqtalǵan ol: «Pandemiia kezinde sot oryndaýshylary men kollektorlar halyqqa qysym kórsetip, aldaý men arbaý faktileri kóbeiip jatyr. Barlyq esepshottary buǵattalǵan otbasylar bar. Árine, negizsiz nesie alǵan turǵyndardyń da kinási bar. Biraq, osyǵan bailanysty problemalyq nesiesi kóp bankterdi anyqtaýdy suraimyz. Sebebi, Qazaqstanda keibir bankter jumys istemeitin, zeinetaqy jarnasy aýdarylmaityn, tólem qabileti joq, basqa bankterde birneshe nesiesi bar adamdarǵa joǵary paiyzben nesie taratqan. Iaǵni halyqtyń áleýmettik jaǵdaiynyń ýshyǵýyna sebepker bolyp otyrǵan bankter men qarjy uiymdary bar», - dedi Lázzat Qojahmetova.
Osy oraida ol indetke bailanysty jumyssyz qalyp otyrǵan adamdardyń nesiege bailanysty problemalary ýshyqqanyn atap ótti.
«Mundai jaǵdaiǵa ákelip otyrǵan bankterdiń de jumysyna saraptama júrgizilip, olar da jaýapqa tartylýy qajet dep esepteimiz», - dedi keńes múshesi.
