Ulttyq qoǵamdyq senim keńesiniń múshesi Aigúl Orynbek keńes aiasynda áleýmettik baǵytta qandai máseleler talqylanyp jatqandyǵyn aitty, dep habarlaidy QazAqparat.
«Qazirgi ýaqytta Prezident Ákimshiligimen, ministrlermen kóptegen áleýmettik máseleni kóterip, tikelei jumys istep jatyrmyz. Jaqsy múmkindikter jasalǵan. Zoom arqyly tikelei efirde aiyna 2 ret ministrlermen kezdesip, ár óńirde bolyp jatqan máselelerdi ashyq talqylaý júrgizilýde. Al bul «Halyq únine qulaq asatyn memleket» tujyrymdamasynyń júieli túrde naqty jumys istep jatqanynyń belgisi. Buryn kóptegen máselelerdi ministrlikterdiń tarapyna ashyq aita almai júrsek, qazir birge talqylap, sheshý tetikterin qarastyrýdamyz. Osyǵan deiin ákimder jasalmaǵan jumystaryn jasyrýǵa tyryssa, qazir jergilikti jerde sheshimin tappaǵan kúrdeli máselelerdi talqylap otyrýǵa múmkindik jasalyp otyr», - dedi ol.
Sonymen qatar Aigúl Orynbek osy ýaqytqa deiin elimizdiń Bilim jáne ǵylym, Aýyl sharýashylyǵy, Densaýlyq saqtaý ministrlerimen birqatar naqty másele talqylanǵanyn atap ótti.
«Bilim jáne ǵylym ministri Ashat Aimaǵambetovpen, Aýyl sharýashylyǵy ministri Saparhan Omarovpen, Densaýlyq saqtaý ministri Aleksei Tsoimen Zoom arqyly onlain kezdesý ótkizdik. Sol kezde Saparhan Omarovpen qazirgi ýaqytta ońtústiktegi baǵasy turaqtalmai otyrǵan maqta máselesin, Aleksei Tsoimen dár-dármek máselesin talqyladyq. Aldaǵy ýaqytta oryn alýy múmkin koronavirýstyń jańa tolqyny kezinde jazdaǵydai dárilik zattar tapshylyǵyn boldyrmaý jaiyn qozǵadyq. Qazirgi ýaqytta osy máselege orai qai jerge qansha aqsha aýdarylǵanyn, qandai dári-dármek jetispei jatqanyn zerdelep otyrmyz», - dedi Aigúl Orynbek.
