Ulttyq qoǵamdyq senim keńesindegi bilik pen qoǵam dialogy otyrystan otyrysqa jaqsaryp keledi. Bul pikirdi Ulttyq qoǵamdyq senim keńesiniń múshesi Maksim Rojin aitty, dep habarlaidy QazAqparat.
«Shynyn aitý kerek, bul Keńes qurylǵan sátten beri meniń nazarymda. Óitkeni bul – el biligi men halyqtyń ózara dialogy. Menińshe, óte jaqsy nátije berýi tiis. Búgin de sóileimin degen adamdar óz oilaryn jetkizdi. Men ózim rýhani-mádeni toptyń múshesimin, ózimiz alty usynys berdik. Bizdiń oiymyzsha, osy alty usynystyń ainalasynda kóterilgen máseleler el nazaryn aýdaryp otyr. Bul jerde múgedek jandar máselesin kóterdik, tilge arnaiy baǵdarlama qajettigin aittyq, jastarmen ásirese, aýyldaǵy jumysty jańa deńgeide júrgizý kerektigin tilge tiek ettik. Taǵy ózimizge jaýyr kóringeni – sońǵy ýaqytta elde kóp jaǵdai týyndap jatyr. Eriktilermen jumys, odan bólek, onlain eriktiler de paida boldy. Bireý shyn nietimen kómektesse, bireýler ony alaiaqtyqtyń bir ailasyna ainaldyrdy. Sol máseleler jóninde usynymdar berdik», - dedi Maksim Rojin tilshilerge bergen suhbatynda.
Onyń aitýynsha, Ulttyq keńestegi basqa da toptarda ár múshe óz baǵytynda, óz deńgeiinde ózekti máselelerdi kóterip jatyr.
«Meniń túsinigimde bul bilik pen qoǵam arasyndaǵy dialogtyń taǵy bir mysaly búgingi tórtinshi otyrysta aiqyn kórindi. Ózim osy dialogqa úlken senim artamyn. Óitkeni osy ýaqytqa deiin el basyna jinalǵan problemalardyń sheshimin taba bildik. Onyń ishinde ózimiz áriptes bolyp júrgen tilshilerdiń «jala jabý» baby qylmys sanatynan alyndy, ekonomikalyq usynystar zań júzinde qabyldandy. Bul bilik pen qoǵam arasyndaǵy dialogtyń keńesten keńeske, otyrystan otyrysqa, usynystan usynysqa jaqsarýy dep oilaimyn», - dedi M. Rojin.
