Jańadan qurylǵan Ulttyq qoǵamdyq senim keńesi saiasi qoǵamdaǵy eń ózekti máseleler boiynsha usynystar berýi tiis. Bul týraly «Kieli Qazaqstan» ǵylymi-zertteý ortalyǵynyń basshysy, Ulttyq qoǵamdyq senim keńesiniń múshesi Berik Ábdiǵaliuly aityp berdi, dep habarlaidy QazAqparat tilshisi.
«Ulttyq keńes qurý Prezidenttiń sailaýaldy platformasynda kórsetilgen. Bir jaǵynan qoǵamdaǵy túrli pikirlerdi eskerip, soǵan usynystardy jinaý bolsa, ekinshi jaǵynan negizgi dialogtyq alań jasaý, mamandarmen, sarapshylarmen aqyldasý boiynsha qurylady degen jospar bar. Onyń quramynda qoǵamdyq pikirdi qalyptastyryp júrgen qairatkerler, jýrnalister, blogerler, saiasatkerler bar. Menińshe bul da bir Prezident janyndaǵy konsýltativti-keńesshi organ retinde saiasi reformalar, áleýmettik, ekonomikalyq jaǵdailarǵa bailanysty qajetti jáne elimizdiń damýyna mańyzdy usynystar berip otyrýy tiis», - dedi Berik Ábdiǵaliuly.
Prezident Ákimshiliginde arnaiy taldaý júrgizilip, Ulttyq keńestiń 41 múshesi iriktelip alynǵan. Olar jylyna kem degende úsh ret jinalyp, ózekti máselelerdi talqylaýy tiis.
«Jeke ózim rýhaniiat, ulttyń damýy, jergilikti memlekettik basqarý, onyń ishinde aýyl máselesi, ákimderdiń jumysy, óńirlik saiasatyna bailanysty tájiribem men usynystarymdy bólisemin dep oilaimyn. Saiasi reformalardyń qajettiligin, liberaldyq printsipterdi iske asyrý qajettiligin aitýymyz kerek», - dedi spiker.
Eske sala ketsek, búgin Memleket basshysy Qasym-Jomart Toqaev Ulttyq qoǵamdyq senim keńesi týraly Jarlyqqa qol qoidy. Sondai-aq keńestiń quramyna kimder engeni belgili boldy.
