Foto: QR UEM
Ulttyq ekonomika ministrliginde Premer-Ministrdiń orynbasary – ministr Serik Jumanǵarinniń tóraǵalyǵymen ótken keńeste Biznestiń tsifrlyq kartasy tanystyryldy, dep habarlaidy Ult.kz.
"Atameken" Ulttyq kásipkerler palatasy ázirlegen jańa júie – deshbordtary, boljamdy modelderi men ashyq statistikasy bar aqparattyq-taldamalyq platforma. Ol kásipkerliktiń qazirgi ahýaly týraly derekter usynyp, memlekettik qoldaý sharalarynyń tiimdiligin baǵalaýǵa, investitsiialyq belsendilikti saraptaýǵa múmkindik beredi.
"Atameken" tóralqa tóraǵasy Raiymbek Batalovtyń aitýynsha, joba memlekettik jáne vedomstvolyq derekter bazasymen integratsiialanady. Bul biznes ortanyń damýyna qatysty obektivti taldaý jasaýǵa jol ashady. Joba 2029 jylǵa deiingi Ulttyq damý jospary aiasynda júzege asyrylýda jáne tolyqtai "Atameken" tarapynan qarjylandyrylady.
Jańa karta kásipkerlerge óńirlik basymdyqtar, investitsiialyq jobalar, naryqtaǵy suranys, sondai-aq biznes júrgizýge qoiylatyn talaptar jóninde tolyqqandy aqparat beredi. Bul derekter kásipkerlerge jańa baǵyttardy anyqtap, tiimdi damý strategiiasyn qurýǵa kómektespek.
Al memleket úshin tsifrlyq karta basym salalardy monitoringileýdiń, investitsiialyq jobalardy júzege asyrýdyń, suranys pen usynysty taldaýdyń, sondai-aq memlekettik qoldaý sharalarynyń tiimdiligin baqylaýdyń quralyna ainalmaq.
Búginde shaǵyn jáne orta biznes elimizdiń JIÓ-niń 40%-yn qamtamasyz etip, jumyspen qamtýdyń jartysyna jýyǵyn qurap otyr. Biznestiń tsifrlyq kartasy osy úlesti arttyrýǵa yqpal etedi dep kútilýde.
Qazirgi tańda "Atameken" UKP memlekettik organdarmen birlesip, kartany QazTech platformasyna engizý jumystaryn pysyqtap jatyr.
