Mańǵystaý oblysy ákiminiń orynbasary 400 myń eýro paranyń bir bóligin aldy degen kúdikke ilikti. Bul týraly búgin Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Janna Bastarova málim etti, dep habarlaidy "Ult aqparat".
Onyń aitýynsha, 2018 jylǵy 3 qarashada Sybailas jemqorlyqqa qarsy is-qimyl ulttyq biýrosymen jedel izdestirý sharalaryn júrgizý barysynda Mańǵystaý oblysy ákiminiń birinshi orynbasary ustaldy.
«Ol memlekettik-jekeshelik áriptestik aiasynda iske asyrylyp jatqan quny 4,5 mlrd teńgeni quraityn investitsiialyq joba boiynsha jalpy qamqorlyǵy úshin qurylys kompaniiasy ókilinen kelisilgen 400 myń eýro para somasy bóliginiń 115 myń eýrosyn aldy dep kúdiktelýde», - dedi Janna Bastarova.
Resmi ókil Aqtaý qalasynyń mamandandyrylǵan tergeý sotymen kúdiktige qatysty qamaýda ustaý túrindegi bultartpaý sharasy sanktsiialanǵanyn atap ótti.
«Tergeý jalǵasýda», - dedi ol.
