QR Ulttyq banki tóraǵasynyń orynbasary Áliia Moldabekova halyqaralyq rezervterdiń ósý sebebin túsindirip, Ulttyq qordyń valiýtalyq aktivteri týraly aitty, dep habarlaidy "Ult aqparat".
«Halyqaralyq rezervterdiń kólemi jyl basymen salystyrǵanda 3,9 mlrd dollar nemese 13,5% ósti. Aldyn ala málimetter boiynsha, maýsymnyń aiaǵynda rezervter 32,9 mlrd dollarǵa jetti, bir ai ishinde rezerv 1,3 mlrd dollarǵa artty. Bul dinamika altyn baǵasy men valiýta aktivteriniń ósýimen bailanysty boldy. Maýsym aiynda biz ekinshi deńgeili bankterdiń Ulttyq banktegi shottaryna valiýtalyq qarajattyń túsýin baiqadyq», - dedi Áliia Moldabekova.
Onyń aitýynsha, altyndy rezervtik aktiv retinde jinaqtaý aǵymdaǵy táýekelderdi eskere otyryp tolyqtai negizdelgen. AQSh dollary álemdik rezervtik valiýta mártebesin saqtaidy. Alaida, investitsiialyq aktiv retinde altynǵa degen suranys artyp keledi. Jyl basynan beri altynnyń baǵasy bir ýntsiia úshin 1521 dollardan 1800 dollarǵa deiin nemese 18% qymbattaǵan.
Sońǵy málimetterge sáikes, Ulttyq qordyń valiýtalyq aktivteri maýsym aiynda 0,75 mlrd dollarǵa tómendep, 57,7 mlrd dollardy qurady.
«Transfertterdi respýblikalyq biýdjetke bólý boiynsha mindettemelerdi oryndaý maqsatynda Ulttyq qordyń aktivterin shamamen 1,4 mlrd dollar nemese 577 mlrd teńgege satty», - dedi Áliia Moldabekova.
Maýsym aiynda Ulttyq qordyń investitsiialyq kirisi shamamen 690 mln dollardy qurady.
«Maýsymda munai naryǵynda oń dinamika baiqaldy. Nátijiesinde teńge 1,7% nyǵaidy»,– dedi ol.
Memleket basshysynyń tapsyrmasyna sáikes, kvazimemlekettik sektordyń valiýta tabysynyń bir bóligin satý mindettemesi osy jyldyń sońyna deiin uzartyldy. Mindetteme 26 naýryzdan 30 maýsymǵa deiin engizilgen sátten bastap mindetti satý kólemi 612 mln dollardy qurady.
