Ulttyq bank tóraǵasynyń orynbasary Mádina Ábilqasymova valiýtalyq naryqtaǵy ahýaldy túsindirdi, dep habarlaidy QazAqparat.
«Munai naryǵy ishki valiýta naryǵyndaǵy jaǵdaiǵa qysym kórsetip keledi. Osy jyldyń qyrkúiek-qazan aralyǵynda munai baǵasy 57,7 AQSh dollarynan 69 AQSh dollaryna deiin ózgerdi. Osy kezeńde teńgeniń AQSh dollaryna shaqqandaǵy baǵamy 385,27 teńgeden 390,12 teńgege deiin jetti», - dedi Mádina Ábilqasymova Parlament Senatynyń Qarjy jáne biýdjet komitetiniń otyrysyndaǵy «2020-2022 jyldarǵa arnalǵan respýblikalyq biýdjet týraly» zań jobasynyń tanystyrylymynda.
Onyń aitýynsha, bankterdiń valiýtalyq svopty óteý jáne klientterdiń valiýtadaǵy shottarynyń shetelge ketýinen Ulttyq banktiń altyn-valiýta rezervi 6,8 paiyzǵa nemese 2,1 mlrd dollarǵa tómendep, 28,8 mlrd dollardy quraǵan.
«Ulttyq qordyń 59,4 mlrd AQSh dollarlyq aktivin qosa alǵanda jalpy halyqaralyq rezervter 88,2 mlrd dollarǵa teń boldy. Osy jyldyń I jartyjyldyǵynyń nátijesi boiynsha tólem balansynyń aǵymdaǵy operatsiialar shoty 1,9 mlrd dollarlyq defitsitpen qalyptasty. 2018 jyldyń I jartyjyldyǵymen salystyrǵanda taýar eksporty 0,8 paiyzǵa ósip, 28,6 mlrd dollarǵa jetti. Taýar importy investitsiialyq jáne azyq-túlikke jatpaityn taýarlarǵa suranystyń ulǵaiýy nátijesinde 7,2 paiyzǵa ósip, 17,2 mlrd AQSh dollaryna teńesti», - dedi Mádina Ábilqasymova.
Eske sala ketsek, Parlament Senatynyń búgingi otyrysynda Mádina Ábilqasymova infliatsiia deńgeiin 2020-2021 jyldary - 4-6 paiyz, 2022 jyldan bastap 3-5 paiyz dálizinde saqtaý kózdelip otyrǵanyn málim etken edi.
