Teńge baǵamy eń aldymen Qytaidaǵy, Resei men EAEO-nyń basqa elderindegi valiýta baǵamyna bailanysty qubylyp jatyr. Sondyqtan ulttyq valiýtanyń qazirgi ózgerisin devalvatsiia dep ataýǵa bolmaidy.
Qor birjasynda dollar baǵamy shamamen 5 teńgege kóterildi. Osyǵan bailanysty Ulttyq banki tóraǵasynyń orynbasary Alpysbai Ahmetov Úkimet kýlýarynda túsinikteme berdi, dep habarlaidy "Ult aqparat".
«2015 jyly tamyz aiynan bastap teńge erkin ainalymǵa jiberildi. Sondyqtan teńge baǵamyna Ulttyq bank áserin tigize almaidy. Kýrsty usynys pen suranys anyqtaidy. Eger spekýliatsiia bolmasa, ulttyq bank aralaspaidy. Sondyqtan bárin suranys pen usynys anyqtaidy. Bizdiń saýda seriktesterimiz Reseide, Qytai men EAEO-da, eń aldymen bul elderdegi valiýta baǵamy áser etedi», - dedi Alpysbai Ahmetov.
Jýrnalister dollardyń KASE-de 5 teńgege kóterilgenin aitqanda Ulttyq Bank tóraǵasynyń orynbasary «Búgin KASE-de? Men tańerteńnen beri osyndamyn, ondai aqparat bolmady» - dep jaýap berip, munyń teńgeniń qunsyzdanýy emes ekenin atap ótti.
«Eger sizder Ulttyq banktiń saityna kirseńizder, biz apta saiyn damýshy naryqtar valiýtasy qalai qubylyp jatqany týraly aqparat shyǵaramyz. Onda Braziliianyń, Meksikanyń valiýtasyn, túrik lirasynyń baǵamyn kóre alasyzdar. Olarda valiýta baǵamy 4 paiyzǵa deiin qubylyp turady. Sondyqtan bul - devalvatsiia emes, tek valiýta baǵamynyń aýytqýy. Ulttyq bank interventsiia istemeidi. Eger de irgeli faktorlar durys bolsa, eger de saýda-sattyq alyp-satarlyq bolmasa, suranys pen usynys irgeli faktorǵa bailanysty bolsa, Ulttyq Bank interventsiia istemeidi. Bul - 2015 jyly tamyzda sheshilgen másele», - dedi Alpysbai Ahmetov.
Aita ketsek, Qazaqstan qor birjasynda teńgeniń dollarǵa shaqqandaǵy baǵamy búgin 324,62 kórsetti. Osyǵan deiin 319-320 bolatyn.
