Ulttyq banktiń monetarlyq operatsiialar departamentiniń direktory Nurjan Tursynhanov ulttyq valiýtanyń quldyraýyna qandai faktorlardyń áser etkenin aitty, dep habarlaidy "Ult aqparat".
Onyń aitýynsha, 2 naýryzda birjalyq saýda-sattyqta ulttyq valiýtanyń aiyrbastaý baǵamy dúisenbi kúngi saýda-sattyqtyń ortasha baǵamynan 2,36 teńgege álsirep, bir dollar 420,40–420,80 teńge aralyǵynda saýdalanýda.
Ótken aptanyń jabylýynan beri teńge 3,2 teńgege nemese 0,8%-ǵa álsiredi.
«Ulttyq valiýtanyń álsireýi úsh basym faktorǵa: OPEK+ otyrysy qarsańynda munaiǵa baǵa belgileýdiń quldyraýyna, álemdik naryqtarda AQSh dollarynyń nyǵaiýyna jáne Qazaqstandaǵy salyq tólemderi kezeńiniń aiaqtalýyna bailanysty boldy. Aptanyń basynan bastap munaidyń baǵasy ótken aptada qol jetkizgen eń joǵary kórsetkishterden aýytqyp, 5,1%-ǵa tómendedi. Koronavirýsqa qarsy vaktsinalaýdyń ilgerileýi, Saýd Arabiiasy tarapynan munai óndirýdi sáýirge deiin kúnine 1 mln barrelge erikti túrde qysqartý, sondai-aq AQSh-ta buryn-sońdy bolmaǵan aiazǵa bailanysty munai óndirýdi májbúrli túrde toqtata turý jyl basynan beri munai baǵasynyń ósýin qoldaǵanyn esterińizge sala keteiik», - dedi Nurjan Tursynhanov.
Onyń pikirinshe, munai naryǵyndaǵy qazirgi jaǵdai aldaǵy ýaqyttaǵy OPEK+ otyrysyna qatysty alańdaýshylyqtyń artýyna bailanysty.
Munai óndirý boiynsha qazirgi shekteýlerdi birshama jeńildetý týraly sheshim qabyldanady dep kútilýde.
Sarapshylar koalitsiia munai óndirýdi kúnine shamamen 0,5 million barrelge ulǵaitady dep boljaidy, al Saýd Arabiia tarapynan erikti shekteýlerdi jalǵastyrý ekitalai.
Kóktemniń alǵashqy kúninde AQSh pen Eýropanyń qor birjalary aitarlyqtai paidamen jabyldy.
Senbi kúni AQSh ókilder palatasy ekonomikaǵa 1,9 trln dollarǵa kómek sharalarynyń toptamasyn bekitti. Prezident Baiden demalys kúnderi Senatty tez áreket etýge shaqyrdy.
Paiyzdyq mólsherlemelerdiń kóterilýine qatysty investorlardyń alańdaýshylyǵyn báseńdetip, bir aptaǵa sozylǵan Amerika memlekettik obligatsiialarynyń kiristilik rallii toqtady.
Osyǵan bailanysty DXY dollar indeksi 90,1-den 91,2-ge deiin nemese 1,2%-ǵa ósti.
«Sonymen qatar, ótken aptada Qazaqstanda shetel valiýtasyn satýdyń neǵurlym joǵary kólemin boljaityn jáne tiisinshe ulttyq valiýtanyń nyǵaiýyna yqpal etetin kezekti salyq kezeńi aiaqtalǵanyn atap ótken jón», - deidi Ulttyq bank ókili.
