QR Ulttyq banki Monetarlyq operatsiialar departamentiniń direktory Nurjan Tursynhanov teńgeniń aiyrbastaý baǵamyna qatysty túsinik berdi, dep habarlaidy QazAqparat.
Aita ketsek, 2 qarashada ulttyq valiýtanyń AQSh dollaryna qatysty baǵamy 0,55% álsirep, búgingi saýda-sattyq 435,2 teńge deńgeiinde jabyldy.
N.Tursynhanov álemdik naryqtardaǵy jaǵdai teńgeniń serpinine qalai áser etkenin aityp berdi.
«Álemdik naryqtardaǵy oqiǵalar táýekeldi aktivterge jáne damýshy elderdiń valiýtalaryna, onyń ishinde teńgege de teris áserin tigizýdi jalǵastyrýda.
Koronavirýstyń ekinshi tolqynynyń qaýpi iske asýda. Álemde syrqattanǵandar sany 46,5 mln jaǵdaiǵa jetti. Germaniia men Frantsiiadaǵy lokdaýnnan keiin Ulybritaniiada jańa shekteý sharalarynyń engiziletini týraly jariialandy: 5 qarasha – 2 jeltoqsan aralyǵynda birinshi qajettilik taýarlaryn satatyndardan basqa barlyq bólshek saýda kásiporyndary jabylady. Osylaisha, koronavirýsty juqtyrýdyń ekinshi tolqyny údep, jahandyq ekonomikanyń ósý perspektivasyna qaýip tóndirýde», - dedi ol.
Spiker atap ótkendei, osynyń aiasynda munaidyń baǵasy edáýir tómendedi.
«2 qarashada saýda-sattyqtyń ashylýynda Brent surypty munai fiýchersiniń baǵasy kúrt tómendep, bir barrel úshin 37 AQSh dollary belgisine jetti, bul jumadaǵy jabylýdan 4,6%-ǵa tómen boldy.
Naryqta usynystyń ósýi de munai úshin teris faktor bolyp tabylady. 31 qazanda Liviianyń resmi tulǵalary elde munai óndirýdiń táýligine 800 myń barrelge deiin ósýi týraly jáne 2021 jyldyń basynda óndirýdi táýligine 1,3 mln barrelge deiin arttyrý jónindegi ózderiniń josparlary týraly habarlady.
Damýshy elderdiń valiýtalary kúrdeli qysymnyń yqpalynda. Eń joǵary álsireýdi Resei rýbli kórsetti, ol saýda sessiiasynyń ashylýynan bastap búgin aǵymdaǵy jylǵy naýryzdan beri alǵash ret bir AQSh dollary úshin 80 rýbl belgisinen asyp, bir kún ishinde 80,95 belgisine jetti. Ótken dúisenbi
26 qazannan bastap basqalaryna qaraǵanda AQSh dollaryna qatysty Resei rýbli (–5,27%), túrik lirasy (–3,94%) jáne Meksika pesosy (–1,43%) álsiredi», - deidi N.Tursynhanov.
Departament direktorynyń aitýynsha, atalǵan barlyq faktor jiyntyǵynda ulttyq valiýtanyń baǵamyna áser etedi jáne budan keiingi serpin álemdik naryqtardaǵy ahýalǵa sózsiz bailanysty bolady.
«Aldaǵy ýaqytta bolatyn Prezident sailaýy men AQSh Kongresine sailaý, sondai-aq munai óndirýdi qysqartýǵa qoldanystaǵy kvotalardy uzartý jónindegi OPEK+ sheshimi álemdik naryqtardaǵy taiaý serpindi aiqyndaityn negizgi faktorlar bolyp tabylady. 2021 jylǵy mámileniń talaptary týraly sheshim aǵymdaǵy jylǵy qarashanyń sońynda – jeltoqsannyń basynda qabyldanatyny kútiledi», - dep túiindedi ol.
