QR Ulttyq banki bazalyq mólsherlemeni jáne paiyzdyq dálizdi jyldyq 12% + /- 1,5 p.t. deńgeiinde saqtaý týraly sheshim qabyldady, dep habarlaidy "Ult aqparat" banktiń baspasóz qyzmetine silteme jasap.
Syrtqy sektorda qalyptasqan belgisizdik jáne COVID-19 koronavirýsynyń, saýda soǵystarynyń taralýyna, geosaiasi shielenistiń ósýine bailanysty iske asyrylǵan táýekelder jaǵdaiynda halyqaralyq sarapshylardyń baǵalaýy boiynsha álemdik ekonomikanyń aitarlyqtai jáne uzaq ýaqytqa baiaýlaýy kútiledi. 2020 jyly álemdik IJÓ-niń ósý qarqyny 2008 jylǵy álemdik daǵdarys ýaqytynan bastap nashar kórsetkishke alyp kelýi múmkin.
«Aldyńǵy aptanyń basynan bastap álemdik taýar jáne qarjy naryqtarynda aitarlyqtai qubylmalylyq baiqalýda. Munai baǵasynyń serpini OPEK+ kelisimine qatysýshylar arasyndaǵy ýaǵdalastyqtyń bolmaýyna jáne Resei men Saýd Arabiiasy arasynda óris alǵan baǵa soǵysyna bailanysty oqiǵalardyń yqpalynda boldy. 2020 jylǵy 9 naýryzdan bastap Brent surypty munaidyń baǵasy bir barrel úshin 31-36,5 AQSh dollary deńgeiinde bekitildi. 2020 jylǵy 16 naýryzda tańerteń munaidyń belgilengen baǵasy bir barrel úshin 32,88 AQSh dollaryn qurady» delingen habarlamada.
Investorlar arasyndaǵy teris kútýler nátijesinde álemdik qor naryǵyndaǵy indekster sońǵy 30 jylda eń úlken tómen kórsetkishti kórsetti.
Ótken aptada AQSh Federaldy rezervtik júiesi qysqa merzimdi ótimdilikti 1,5 trln AQSh dollarǵa berýdi jáne keshe kezekten tys tártippen negizgi paiyzdyq mólsherlemeni 0-0,25% deiin tómendetip, ekonomikany qoldaý jáne múmkin quldyraý saldaryn azaitý úshin jalpy somasy 700 mlrd AQSh dollary sandyq jumsartý baǵdarlamany jariialady. Damýshy elder men munaidy eksporttaýshy elder valiýtalarynyń álsireýi baiqaldy.
Osy jaǵdailarda Ulttyq bank baǵa turaqtylyǵyn ustap turý maqsatynda 2020 jylǵy 10 – 13 naýryz aralyǵynda birqatar shuǵyl jáne aldyn alý sharalaryn qabyldady.
2020 jylǵy 10 naýryzda bazalyq mólsherlemeniń 12%-ǵa deiin artýy naryqtarda úreidiń taralýyna aldyn ala áser etti jáne naryq agentteriniń strategiiasyna der kezinde túzetýler engizdi, bul paida bolǵan infliatsiialyq táýekelderdi shekteýge jáne teńgedegi aktivterdiń qunyn qorǵaýǵa múmkindik berdi.
Sonymen birge, paiyzdyq dálizdi 1,5 p.t. deiin keńeitý bankterdiń Ulttyq Bankten teńgemen qaryz alý qunyn 13,5%-ǵa deiin ulǵaita otyryp, naryqqa qatysýshylar tarapynan aiyrbastaý baǵamyna alypsatarlyq qysym kórsetý múmkindigin shekteýge baǵyttaldy. Aqsha naryǵyndaǵy mólsherlemeler paiyzdyq mólsherlemelerdiń jańartylǵan dáliziniń joǵarǵy shegine jaqyndap, 13,48%-ǵa jetti. Ulttyq Bank bankterge kólemi shekteýsiz ótimdilik berý boiynsha operatsiialardy kún saiyn júrgizedi.
«Saýdanyń syrtqy talaptarynyń kúrt ózgerýi jáne shetel valiýtasy usynysynyń tapshylyǵy talaptarynda valiýta naryǵyndaǵy jaǵdaidy turaqtandyrý úshin Ulttyq Bank jekelegen kezeńderde jalǵyz satýshy bola otyryp, valiýtalyq óktemdikter júrgizdi. Atap aitqanda, 2020 jylǵy 10 naýryzda baǵamnyń negizsiz qubylmalylyǵyn boldyrmaý úshin valiýtalyq saýda-sattyqta frankfýrttyq aýktsion ádisi iske qosyldy. Ulttyq Bank kvazimemlekettik sektordyń, ekinshi deńgeidegi bankterdiń jáne aiyrbastaý pýnktteriniń valiýtalyq operatsiialaryn úilestirdi jáne monitoring júrgizdi. Bul ózgergen syrtqy jaǵdailardyń teńgeniń aiyrbastaý baǵamyna teris áserin tómendetýge múmkindik berdi, ol 2020 jylǵy 6 – 13 naýryz aralyǵynda bir AQSh dollary úshin 405,62 teńgege deiin 6,1%-ǵa tómendedi» dep habarlaidy qarjy uiymy.
Ulttyq bank jahandyq ekonomikanyń damý perspektivalarynyń aitarlyqtai nasharlaýyn, suranystyń tómendeýin jáne álemdik taýar naryqtarynda qubylmalylyqtyń kúsheiýin jańa ekonomikalyq shynaiylyq retinde qarastyrady. Qalyptasqan jaǵdaidy taldaý negizinde Ulttyq bank Brent munaiy baǵasynyń bir barrel úshin 60 AQSh dollarynan 35 AQSh dollaryna deiingi budan bylaiǵy serpini týraly paiymdaýyn qaita qarady. Baǵalardyń jańa deńgeii boljamdyq kezeńniń sońyna deiin bazalyq stsenarii retinde qarastyrylady. Damýdyń stsenariilik nusqasynyń nasharlaýy infliatsiianyń 2020 jyly nysanaly dálizdiń joǵarǵy shegine shyǵý táýekelin arttyrdy.
Qazirgi sátten bastap jańa irgeli jaǵdailardy eskere otyryp, Ulttyq Bank erkin baǵam belgileý jáne infliatsiialyq targetteý saiasatyna sáikes tepe-teń baǵamnyń qalyptasýyna yqpal etýge niettenip otyr.
Ulttyq bank ishki qarjy naryǵyndaǵy jaǵdaidy budan ári turaqtandyrýǵa qajetti quraldarǵa ie. Qajet bolǵan jaǵdaida, syrtqy sektor tarapynan teris saldarlardy tejeý úshin qarjy naryǵyn retteý jáne damytý agenttigimen birlesken jáne úilestirilgen sharalar qabyldanýy yqtimal. Ulttyq bank jaǵdaiǵa monitoring júrgizýin jalǵastyrýda jáne irgeli faktorlardyń qoldanylýyn kórsetpeitin jáne qarjylyq turaqtylyqqa qaýip tóngen jaǵdailarda baǵam aýytqýlaryn retteý quqyǵyn ózine qaldyrady.
Álemdik ekonomikadaǵy ahýal nasharlaǵan jaǵdaida baǵa turaqtylyǵyn, eldiń valiýta naryǵyndaǵy jáne qarjy naryǵyndaǵy jaǵdaidy ustap turý úshin qosymsha sharalardyń qabyldanýy múmkin.
Qazaqstan Respýblikasy Ulttyq bankiniń bazalyq mólsherleme boiynsha kezekti josparly sheshimi 2020 jylǵy 27 sáýirde Nur-Sultan qalasy ýaqytymen saǵat 15:00-de jariialanady.
