Ulttyq bank qolma-qol shetel valiýtasyn syrtqa shyǵarýdy shekteý týraly málimdeme jasady, dep habarlaidy "Ult aqparat".
Búgingi tańda syrtqy kúizelisterdiń saldarynan qolma-qol shetel valiýtasyna suranys artqany baiqalady.
QR ekinshi deńgeili bankterde shottardaǵy, depozitterdegi jáne baǵaly qaǵazdardaǵy qaldyq túrindegi ótimdi valiýtalyq aktivterdiń jetkilikti kólemi bar.
Soǵan qaramastan, qolma-qol shetel valiýtasyna degen suranysty qanaǵattandyrýda – qolma-qol shetel valiýtasyn basqa elderden Qazaqstanǵa jetkizý isinde logistikalyq qiyndyqtar týyndap otyr.
Qarjylyq turaqtylyqqa tónetin qaterler men alypsatarlyqqa qatysty suranystyń qysymyn tómendetý úshin Qazaqstan Respýblikasy Prezidentiniń Jarlyǵymen Qazaqstan Respýblikasy Úkimeti men Qazaqstan Respýblikasy Ulttyq bankiniń usynysy negizinde Qazaqstannan alyp shyǵýǵa shekteýler engizildi:
1) 10 000 (on myń) AQSh dollary ekvivalentinen asatyn jáne Qazaqstan Respýblikasy Ulttyq bankiniń áketý kúnine belgilengen baǵamy boiynsha eseptelgen somadaǵy qolma-qol shetel valiýtasyna jáne (nemese) shetel valiýtasyndaǵy aqsha quraldaryna;
2) tazartylǵan altynnyń 5, 10, 20, 50 jáne 100 gramm altyn quimalary jáne Qazaqstan Respýblikasynyń Ulttyq Banki shyǵarǵan altynnan, kúmisten jasalǵan investitsiialyq monetalaryna, sondai-aq salmaǵy 100 gramnan asatyn tazartylǵan altynǵa.
Qabyldanǵan bul sharalar qolma-qol shetel valiýtalarynyń shekten tys syrtqa shyǵyp ketpeýin baqylaýdy, Ulttyq banktegi rezervterdiń saqtalýyn, sondai-aq jinaq quraldaryn ártaraptandyrýdy qamtamasyz etedi.
