Qazaqstanda biylǵy jeti aida infliatsiia 3,8 % boldy. Bul ótken jylǵy kórsetkishten (5,2%) tómen bolyp otyr. Mundai aqparatty QR Ulttyq banki taratty, dep habarlaidy Ult.kz tilshisi QazAqparat agenttigine silteme jasap.
Baspasóz qyzmetiniń habarlaýynsha, jyldyq infliatsiia shildede 7,1%-ǵa deiin tómendedi, bul azyq-túlik naryǵyndaǵy ahýaldyń turaqtanýyna sebepshi boldy. Jyldyq infliatsiia 2017 jylǵa belgilengen 6-8% dálizi sheginde tur.
Jyl ishinde bazalyq infliatsiianyń kórsetkishi 6,7%-ǵa deiin birtindep tómendegen, ol infliatsiialyq qordyń jaqsarýyna óz septigin tigizgen.
Ai saiyn halyq arasynda infliatsiia nátijeleri boiynsha saýalnama júrgiziledi. Shildede halyqtyń infliatsiiany qabyldaý jónindegi pikiri boiynsha infliatsiia turaqty bolmaq.
Ótken aidaǵy baǵanyń ósýin saýalnamaǵa qatysýshylardyń kópshiligi (43%) qalypty retinde qabyldady. Al ony kúshti dep baǵalaǵan respondentterdiń sany odan 10 tarmaqqa az. Bir jyl boiy halyqtyń baǵanyń ósýin baǵalaýy bir qalypty bolyp tur.
Alaida, kelesi aida baǵanyń qalypty ósýin kútetin halyqtyń úlesi ulǵaidy.
Keler jyly baǵanyń ósýin kútetinder arasynda ósý qarqynynyń aǵymdaǵy deńgeide saqtalatyndyǵy týraly pikir basym (36,3%-38,9%).
2017 jylǵy shildede «Sizdiń pikirińizshe, jalpy alǵanda baǵalar kelesi 12 aida qalai ózgeredi?» degen suraqqa berilgen jaýaptar boiynsha infliatsiianyń aldaǵy bir jylǵa eseptelgen sandyq baǵasy halyqtyń infliatsiialyq kútýleriniń 2018 jylǵa arnalǵan nysanaly dáliz sheginde (5-7%) 6,4% bolatynyn kórsetti.
