2021 jyldyń qarasha aiyndaǵy halyqtyń infliatsiialyq kútýi boiynsha Ulttyq banktiń Aqsha-kredit saiasaty departamenti direktorynyń orynbasary Denis Cherniavskiidiń túsinik berdi, dep habarlaidy QazAqparat UB saityna silteme jasap.
«2021 jylǵy qarashada aldaǵy jylǵa infliatsiialyq kútýlerdi sandyq baǵalaý ósti jáne 10,8%-dy (qazanda 10,3%) qurady. Respondentterdiń eń úlken úlesi aldaǵy 12 aida baǵa ósiminiń jedeldeýin kútedi – 35% (qazanda 33%), bul halyqty zertteý tarihyndaǵy eń joǵary mán boldy», - dedi Denis Cherniavskii.
Onyń aitýynsha, qarashadaǵy saýalnama nátijeleri ekinshi ai qatarynan infliatsiialyq kútýlerdiń sapalyq baǵalaýyndaǵy tarihi ósimdi jańartý jalǵasyp jatqanyn kórsetti.
«Úi sharýashylyqtarynyń kópshiligi aldaǵy 12 aida baǵanyń ósý qarqyny údeidi dep kútedi. Búgingi infliatsiiany qabyldaý, atap aitqanda, azyq-túlik pen qýat kózderiniń qymbattaýyna bailanysty joǵary deńgeide qalyp otyr. Respondentterdiń kópshiligi (74%) sońǵy 12 aida baǵanyń qarqyndy óskenin atap ótti», - dedi.
Sarapshynyń pikirinshe, tutynýshylardyń kóńil-kúii qarashada tómendegen.
«Sonymen qatar bolashaq tabystarǵa jáne jalpylai alǵanda el ekonomikasynyń damýynyń qysqa jáne uzaq merzimdi perspektivalaryna degen úmittiń nasharlaýy jalǵasyn tapty. Shyǵyndar turǵysynan respondentterdiń kópshiligi áli de iri kólemdegi satyp alýlarǵa qatysty ustamdylyq tanytady: respondentterdiń tek 19%-y úlken shyǵyndarǵa daiyn. Respondentterdiń kópshiligi (qarashada 35%, qazanda 32%) qazirgi ýaqytty – jinaqtardy qalyptastyrý úshin qolaisyz dep baǵalady», - dedi Denis Cherniavskii.
