QR Ulttyq banki elimizdegi bankterdiń aktivteri sapasyna baǵalaý júrgizedi. Bul týraly búgin QR Parlamenti palatalarynyń birlesken otyrysynda depýtattardyń saýalyna jaýap bergen QR Ulttyq banki tóraǵasy Daniiar Aqyshev málim etti, dep habarlaidy QazAqparat.
«2014 jyly munai baǵasy quldyrai bastaǵannan keiin eldegi makroekonomikalyq ahýal nasharlap ketti. Ulttyq valiýta baǵamynyń ózgerýine, infliatsiianyń kúrt ósýine bailanysty ekinshi deńgeili bankter zardap shegip, zaemshylardyń sapasy nasharlady. Osyǵan bailanysty Ulttyq bank elimizdegi bank sektoryn saýyqtyrý boiynsha júieli jumystardy bastady. Ol úshin ne qajet boldy? Jetkilikti deńgeide saýyqtyrylmaǵan bank sektoryna nesie bere bastasaq 2-3 jyldan keiin jańa daǵdarysqa tap bolar edik. Sol sebepti ret-retimen ilgerletý sheshimi qabyldandy. Iaǵni, nesielendirýdi jandandyrý úshin aldymen bank sektoryn saýyqtyryp alý qajet», - dedi D. Aqyshev.
Ulttyq bank tóraǵasynyń aitýynsha, eki iri júie quraýshy bankpen jumystar júrgizý týraly sheshim qabyldanǵan. Qazirgi ýaqytta eki banktiń arasynda satý-satyp alý mámilesi júzege asyrylýda. Mámileniń naqty qai kúnde aiaqtalatyndyǵy ázirshe belgisiz.
«Ulttyq bank elimizdegi bankterdiń aktivteri sapasyna baǵalaý júrgizýdi josparlap otyr. Bul shara shynaiy kartina bankterdiń esep-qisaptaryndaǵy derekterden de nashar bolýy múmkin ekendigin kórsetý úshin jasalady. Mundai jait oryn alǵan bolsa, onda bank aktsionerleri atalǵan bankterge aýqymdy qarjy quiýǵa tiisti bolady», - dedi ol.
