Ulttyq bank tóraǵasynyń orynbasary Oleg Smoliakov Bank RBK bank klientteriniń qarjysyn alýyna qoiylǵan shekteý birtindep joiylatynyn málimdedi, dep habarlaidy "Ult aqparat" Azattyqqa silteme jasap.
Astanada parlament otyrysynyń arasynda Smoliakov Bank RBK men Ulttyq bank arasynda jasalǵan "kelisim jobasy" boiynsha bankke aldymen aktsionerler qarjy quiatynyn, sodan keiin ǵana Ulttyq bank sýbsidiialy nesie beretinin habarlady. "Bul protsestiń barlyǵy jyl sońyna deiin aiaqtalýy tiis" dedi Smoliakov jýrnalisterge.
Smoliakovtiń sózinshe, bank jeke tulǵalardyń qarjysyn sheship alýyna qoiǵan shekteýdi birtindep alatynyn, eń aldymen "áleýmettik mańyzdy tólemderdi" - stýdentter, jalaqy alatyndar men nesie kartasyn paidalanatyndarǵa, sodan keiin ǵana basqa klientterge tólem jasala bastaitynyn aitty. Ol Bank RBK-ge qarjy aldaǵy eki-úsh aida túsetinin aitty.
7 qarashada Ulttyq bank tóraǵasy Daniiar Aqyshev "Bank RBK-ni saýyqtyrý sharalary jasalyp jatqanyn" habarlaǵan. Aqyshev Ulttyq bank sharalardy úkimetpen jáne "Qazaqmys" korporatsiiasymen birlesip jasaǵanyn aitqan.
3 qarashada "Nur Otan" partiiasynyń jiynynda Qazaqstan prezidenti Nursultan Nazarbaev Bank RBK-ke qatysty shaǵymdardy estip, bilip otyrǵanyn málimdegen. Prezident banktegi jaǵdai "aktsionerlerdiń urlyǵynan týǵan másele" ekenin aityp, "aktsionerlerdiń esin jidyrýǵa" ýáde bergen. "Urylar ózderine tiisti jerde otyrady. Olarǵa aqshany qaitartqyzamyz, bank jumysyn qalpyna keltiremiz. Aktsionerler, ásirese jeke tulǵalar óz qarjysyn ala alady" dedi Nazarbaev. Degenmen, Bank RBK-dan qarjy jymqyrylǵanyn dáleldeitin sot sheshimi týraly aqpar nemese banktiń qandai da bir zań buzǵany týraly fakt ázirge ashyq derekkózderine túsken joq.
