Ulttyq banktiń monetarlyq operatsiia departamentiniń direktory Nurjan Tursynhanov altyn naryǵyndaǵy jaǵdaidy túsindirdi, dep habarlaidy "Ult aqparat".
Keiingi eki aida birinshi ret altynnyń baǵasy troi ýntsiiasyna 1900 dollardan tómen túsip ketti. Ulttyq banktiń monetarlyq operatsiia departamentiniń direktory Nurjan Tursynhanov sary metall naryǵyndaǵy jaǵdaidy túsindirip, bul jaǵdai Ulttyq banktiń rezervine qalai áser etetinin aityp ótti.
«23 qyrkúiekte altynnyń baǵasy troi ýntsiiasyna 1865 dollar deńgeiinen tómen túsip ketti. Bul – qyrkúiektiń basyndaǵy baǵaǵa qaraǵanda 100 dollarǵa nemese 5 paiyzǵa az. AQSh tarapyndaǵy oń ekonomikalyq málimetter, Eýroodaq pen Ulybritaniia elderindegi koronavirýs juqtyrǵan azamattar kóbeiedi-aý degen úrei, sonymen birge Chikago federaldyq rezerv banki basshysynyń AQSh-ta infliatsiia 2 paiyzdyq ortasha deńgeige jetkenshe stavkany kóterý týraly pikiri – dollardyń indeksin segiz aptalyq maksimýmǵa itermeledi. AQSh-ta dollardyń kúsheiýi álem naryqtarynda altynnyń tartymdylyǵyn tómendetti. Altynnyń baǵasy osy jyldyń shilde aiynan bergi minimýmdy kórsetip tur», - deidi ol.
Onyń aitýynsha, COVID-19 jahandyq pandemiiasy men damyǵan elderdiń ortalyq bankteriniń oǵan jaýap retindegi monetarlyq saiasaty biyl altynnyń baǵasyna edáýir áser etken. Al altynnyń baǵasy tamyz aiynda tarihi maksimýmdy kórsetip, jyl basynan beri 36 paiyzǵa qymbattaǵan. Qazirgi baǵanyń korrektsiiasyna qaramastan altyn investitsiialyq aktiv retinde jyl basynan beri 24 paiyzdyq ósimdi kórsetip, kósh bastap tur.
«Altyn baǵasynyń keiingi kúnderdegi ala-qulalyǵy aidyń qorytyndysy boiynsha Ulttyq banktiń altyn valiýta rezerviniń qaita baǵalanýyna áser etýi múmkin», - dedi Nurjan Tursynhanov.
Qazirgi ýaqytta COVID-19 indetiniń ekinshi tolqynynyń qaýpi saqtalyp tur. AQSh pen Qytai arasyndaǵy saiasi teketires, AQSh-ta sailaýdyń jaqyndaýy – baǵanyń týrbýlenttigine ákelýi yqtimal. Altyn dástúrli túrde strategiialyq investitsiia bolyp qala beredi.
