Ulttyq bank tóraǵasynyń orynbasary Mádina Ábilqasymovanyń sózine sensek, infliatsiia deńgeiin 2020-2021 jyldary - 4-6 paiyz, 2022 jyldan bastap 3-5 paiyz dálizinde saqtaý kózdelip otyr, dep habarlaidy QazAqparat.
«Ulttyq banktiń aqsha-nesie saiasatynyń negizgi maqsaty – baǵa turaqtylyǵyn qamtamasyz etý. Infliatsiia boiynsha 2020-2021 jyldarǵa arnalǵan maqsat 4-6 paiyzdyq, 2022 jyldan bastap 3-5 paiyzdyq dálizde belgilendi. Ulttyq banktiń bazalyq mólsherlemesi aqsha-nesie saiasatynyń negizgi quraly bolyp qalady. Ulttyq bank bazalyq mólsherlemeniń deńgeiin eldegi qalyptasqan jáne kútiletin infliatsiianyń mólsherine qatysty, sondai-aq syrtqy faktorlardy eskere otyryp belgileidi. Bul rette onyń deńgeii naqty kórsetýde 3-3,5 paiyzdyq deńgeide saqtalady», - dedi Mádina Ábilqasymova Parlament Senatynyń Qarjy jáne biýdjet komiteti otyrysyndaǵy «2020-2022 jyldarǵa arnalǵan respýblikalyq biýdjet týraly» zań jobasynyń tanystyrylymynda.
Onyń aitýynsha, biyl qyrkúiekte jyldyq infliatsiia 5,3 paiyzdy quraǵan. Azyq-túlik baǵasynyń jyldyq deńgeide 9,1 paiyzǵa ulǵaiýýy infliatsiiaǵa barynsha sebep bolyp otyr.
«Infliatsiianyń nysanaly dáliz sheginen shyǵý táýekelderin boldyrmas úshin 9 qyrkúiekte Ulttyq bank bazalyq mólsherlemeni 9,25 paiyzǵa deiin kóterdi. Ulttyq banktiń baǵalaýynsha, infliatsiia osy jyldyń qorytyndysy boiynsha 5,7-5,8 paiyzdyq deńgeide qalyptasady. 2020 jyly 4-6 paiyzdyq nysanaly dáliz ishinde saqtala otyryp, infliatsiia birshama tómendeidi dep kútiledi», - dedi Ulttyq bank tóraǵasynyń orynbasary.
