Qazaqstan Ulttyq Bank ózderin investitsiialyq kompaniia retinde kórsetip júrgen alaiaq toptardyń belsendi áreketke kóshkenin habarlady.
Qaskóiler mobildi qosymshalar, saittar men jarnamalyq rolikter jasaýǵa beiimdelip alǵan. Olardyń mazmuny jeke tulǵalardyń qarajatyn basqarýǵa tartý sekildi baǵdarlamalardy sipattaidy jáne ony ekinshi deńgeili banktermen, QUB-pen nemese basqa da memlekettik organdarmen birlesip ázirlengen dep kórsetedi. Mundai jarnamalar – feik.
Anyqtalǵan alaiaqtyq piǵyldaǵy resýrstar men telefon qosymshalary Qazaqstannyń «memlekettik qorynan», «Ulttyq resýrstardan» nemese qarjy naryǵyn dinamikalyq boljaýdan tez paida tabýdy usynady, alaida, mundai múmkindikter tek tólem jasaǵan qoldanýshyǵa ǵana beriledi. Sondai saittarǵa ótinish qaldyrǵan internet-qoldanýshylar aqshasynan aiyrylatyndai táýekelge barady: alaiaqtar aldymen onyń jeke derekterin qolǵa túsiredi, sóitip telefon arqyly habarlasyp, aqshany óz rekvizitterine aýdartyp alýǵa áreket etedi. Ári qarai, aqsha aýdarylǵannan keiin ony keri qaitarý protsedýrasy uzaq ta kúrdeli bolýy múmkin. Sóite tura salynǵan qarajatty keri qaitarý úshin qosymsha aqsha salýǵa qoldanýshyny taǵy májbúrleýi yqtimal.
Alaiaqtardy qalai anyqtaýǵa bolady:
ondai saittar az ýaqyt ishinde investitsiiadan joǵary ári turaqty paida tabýǵa kepildik beredi;
qandai da bir bailanys deregi joq;
resmi memlekettik tulǵalardyń, memlekettik organdar men ulttyq kompaniia basshylarynyń fotosýretteri men oidan qurastyrylǵan málimdemeleri keltiriledi; jalǵan litsenziialar nemese quqyq belgileitin qujattar paidalanady;
memlekettik organdardyń, ekinshi deńgeili bankterdiń nemese ulttyq kompaniialardyń logotipteri men ataýlary shyn bolýy múmkin. Alaida, ol zańdy tulǵalardyń, onyń ishinde Ulttyq Banktiń mundai alaiaqtardyń platformasyna qatysy joq.
Ulttyq Bank jeke tulǵalardyń shottaryna qyzmet kórsetpeitinin, aqshalai esep aiyrysýlar men mámileler jasamaitynyn, memlekettik qorlarda tabys tabý úshin qandai da bir platformalar ázirleýge qatyspaitynyn eske salady. Is júzinde aktivterdi investitsiialyq basqarýǵa litsenziiasy bar uiymdardyń tizimi Qazaqstan Respýblikasy Qarjy naryǵyn retteý jáne damytý agenttiginiń resmi saitynda jariialanǵan.
Eger siz nemese sizdiń tanystaryńyz osyndai saittarǵa, mobildi qosymshalarǵa tap bolsa nemese telefon-alaiaqtarynyń qurbany bolsa, alaiaqtyq faktisi boiynsha quqyq qorǵaý organdaryna aryzben júginýińiz qajet.
Ulttyq Banktiń jeke tulǵalardyń aqshasyn tartpaitynyn jáne halyq úshin «investitsiialyq baǵdarlamalardyń» ázirleýshisi bolyp tabylmaitynyn anyqtap alý úshin QUB-tyń resmi bailanys ortalyǵyna 1477 qysqa nómiri arqyly (uialy telefonnan tegin) habarlasyńyz.
