Qazaqstan Ulttyq banki aldaǵy 10 jylǵa arnalǵan aqsha-kredit saiasaty salasyndaǵy negiz bolarlyq qujat – aqsha-kredit saiasatynyń 2030 jylǵa deiingi strategiiasyn maquldap, jariialady. Osy oraida QR Ulttyq banki tóraǵasynyń orynbasary Aqyljan Baimaǵambetov atalǵan qujatqa qatysty túsinik berdi, dep habarlaidy QazAqparat.
Onyń aitýynsha, Memleket basshysy 2020 jyldyń 1 qyrkúiegindegi Joldaýynda «aqsha-kredit saiasatyn jańadan qaraý» mindetin atady. Osy tapsyrmany iske asyrý úshin júrgizilip otyrǵan aqsha-kredit saiasatynyń tiimdiligin arttyrý maqsatynda Ulttyq bank aqsha-kredit saiasatynyń 2030 jylǵa deiingi strategiiasyn ázirledi. Strategiia 2025 jylǵa deiingi ulttyq damý jospary siiaqty eldiń uzaq merzimdi qujattarymen úilestirildi.
«Bizdiń negizgi maqsat – baǵa turaqtylyǵyn qamtamasyz etý. Infliatsiialyq targetteý rejimine ótkennen keiin jyl saiyn aqsha-kredit saiasatynyń negizgi baǵyttary qabyldandy, olarda júrgizilip otyrǵan saiasattyń aldaǵy jylǵa arnalǵan basymdyqtary aiqyndaldy. Endi Strategiiada uzaq aralyqqa paiym qalyptastyryldy, Qazaqstandaǵy siiaqty basqa da elderdegi infliatsiialyq targetteýge ótýdiń tájiribesi taldandy, sondai-aq transmissiialyq tetiktiń tiimdiligin shekteitin aǵymdaǵy kedergiler qaraldy», - dedi Aqyljan Baimaǵambetov.
Aqpanda qabyldanǵan eldiń 2025 jylǵa deiingi ulttyq damý josparyn eskere otyryp, Strategiiada kedergilerdi joiýǵa jáne tolyqqandy infliatsiialyq targetteý rejimine ótýdi aiaqtaýǵa múmkindik beretin negizgi basymdyqtar kórsetildi.
«Biz halyqaralyq qarjy institýttarymen, sonyń ishinde HVQ, Dúniejúzilik Bank, EQDB-men, sondai-aq qazaqstandyq sarapshylarmen, Qazaqstannyń qarjygerler qaýymdastyǵymen jáne bank sektorynyń ókilderimen Strategiia jobasyn talqylaý boiynsha birneshe raýnd ótkizdik. Olardyń qorytyndysyna sai qujat tolyqtyrylyp, pysyqtaldy», - dedi ol.
Sonymen qatar ol infliatsiialyq targetteýdiń tolyqqandy rejimine kóshý boiynsha qajetti sharalar týraly aityp berdi.
2015 jyly infliatsiialyq targetteý rejimine kóshken sátten bastap Ulttyq bank onyń «tórt tirek» dep atalatyn negizgi elementterin engizdi. Bul ózgermeli valiýta baǵamy, paiyzdyq saiasat, ashyq bailanys, taldaý jáne boljaý júiesi.
«Soǵan qaramastan, engizilgen rejimdi «ótpeli» dep sipattaýǵa bolady, óitkeni qurylymdyq shekteýler bar, nátijesinde aqsha-kredit saiasatynyń eldegi infliatsiialyq protsesterge áseri álsiredi. Bul kóbine ekonomikanyń tómen ártaraptandyrylýymen, importqa táýeldiliktiń joǵary bolýymen, qarjy naryǵynyń jetkilikti damymaýymen, jeńil fiskaldyq shekteýler kezindegi memlekettik kreditteýdiń belsendi bolýymen bailanysty. Halyqaralyq tájiribede mundai rejim «light IT» dep atalady. Atalǵan syn-qaterlerdi eńsere otyryp, biz ekonomikanyń túrli táýekelderge ushyraýynyń tómendeýin jáne sonyń saldarynan aqsha-kredit saiasatynyń infliatsiiaǵa áseriniń kúsheiýin kútemiz. Osylaisha, biz infliatsiialyq targetteýdiń tolyq nemese «full-fledged» rejimine qol jetkize alamyz. Bul qabyldanatyn sheshimderdiń tiimdiligin arttyrýǵa jáne ekonomikanyń ornyqty damýy úshin bazalyq artyqshylyqtarǵa qol jetkizýge múmkindik beredi», - dep túsindirdi UB ókili.
Munymen qosa, Aqyljan Baimaǵambetov Strategiia aiasyndaǵy jumystyń negizgi baǵyttaryn aitty.
«Qazirgi bar syn-qaterlerdi eńserip, aqsha-kredit saiasatynyń tiimdiligin arttyrý úshin biz monetarlyq negizderdi kúsheitý, qarjy sektoryn odan ári damytý, sondai-aq eldiń makroekonomikalyq saiasaty salasyndaǵy is-qimyldardy úilestirý jónindegi basym mindetterdi qamtityn úsh basty baǵytty bólip kórsetemiz», - dedi ol.
