Qazaqstan Respýblikasynyń Ulttyq Banki 28 qańtarda 2020 jylǵy úlgidegi 200 teńgelik monetalardy ainalymǵa shyǵarady, – dep habarlaidy Ulttyq bank.
«Monetalardyń dizainy Qazaqstan Respýblikasy Prezidentiniń 2018 jylǵy 12 jeltoqsandaǵy № 804 Jarlyǵymen bekitilgen Ulttyq valiýta – Qazaqstan teńgesi banknottary men monetalary dizainynyń tujyrymdamasyna sáikes oryndaldy. Bikolorly ainalystaǵy monetalar dizainynyń stilistikasynda shyǵys jáne batys mádenietteriniń kórkemdik elementteriniń úilesimi kórinis beredi»,- delingen habarlamada.
Bikolorly ainalystaǵy monetalardyń sipaty: Monetalardyń syrtqy saqinasy neizilberden jasalǵan, ishki diski nikeldi jezden daiyndalǵan. Qyry tegis jáne bederli sektorlarmen kezektesip otyratyn 16 oiyqpen bederlengen.
Monetalardyń syrt jaǵynda ortalyq bóliginde QR Memlekettik Eltańbasy, ainaldyra emitent eldi bildiretin «QAZAQSTAN RESPÝBLIKASY» degen jazba beinelengen. Monetanyń tómengi jaǵynda soǵylǵan jylyn bildiretin «2020» degen jazý bar.
Monetalardyń bet jaǵynda (aversinde) ortalyq bóliginde nominalyn bildiretin jáne nominal tsifrynyń keskinin qaitalaityn kóldeneń syzyqtar bederi aiasynda oryndalǵan «200» degen jazý bar. Monetanyń joǵarǵy jáne tómengi bólikterinde – tik syzyqtar túrinde oryndalǵan oiý-órnek keskinderi. Monetanyń tómengi bóliginde – taramdalǵan syzyqtar aiasynda oryndalǵan, ulttyq valiýtanyń mátindik ataýyn bildiretin «TEŃGE» degen jazý. Monetanyń sol jaq bóliginde QAZAQSTAN ULTTYQ BANKI emitent bankti bildiretin «QUB» abbreviatýrasy bar. Monetanyń oń jaq bóliginde – Qazaqstan teńge saraiynyń taýar belgisi (logotip) kórsetilgen.
Tehnikalyq sipattamalary:
Metall quramy: neizilber/nibrass
Massasy: 7,5 gramm Diametri:
syrtqy saqinasy – 26 mm, ishki diski – 18,3 mm
Qalyńdyǵy – 1,90 mm Qyry: 16 oiyqtar.
Aita ketý kerek, nominaly 200 (eki júz) teńgelik banknottar zańdy tólem quraly bolyp qalady jáne ainalystan tabiǵi tozý boiynsha alynady.
