Ulttyq bank biylǵy 21 jáne 22 maýsymda 101 million dollarǵa interventsiia júrgizgen, - dep habarlaidy kaz.tengrinews.kz tilshisi banktiń baspasóz qyzmetine silteme jasap.
Baspasóz qyzmetiniń málimetinshe, teńge qubylmalylyǵynyń ishki valiýta naryǵyndaǵy údeiýin shekteý maqsatynda Ulttyq bank 101 million AQSh dollary mólsherinde satýdy júzege asyra otyryp, AQSh dollaryna degen artyq suranysty qanaǵattandyrý týraly sheshim qabyldaǵan. Valiýtalyq óktemdikter shetel valiýtasyna degen suranystyń sharyqtaǵan kezeńinde - 2017 jylǵy 21 jáne 22 maýsymda júrgizildi.
Sonymen qatar, 2017 jylǵy maýsymda munai baǵasynyń tómendeýi jáne Resei rýbliniń álsireý úrdisi baiqalǵany, al munyń ishki valiýta naryǵyna belgili bir dárejede áser etkeni aitylady. "21 maýsymda Brent markaly munai baǵasy naryqtyń munai ónimderimen jahandyq shekten tys tolýynyń saqtalýyna jáne OPEK kelissózderiniń tiimdiligine bailanysty qaýip-qaterler aiasynda bir barrel úshin 45 AQSh dollarynan tómen deńgeige deiin arzandap, jyldyń basynan bergi eń tómengi mánge jetti. Resei rýbliniń baǵamy irgeli faktordyń ózgerýine tez arada den qoidy, sodan keiin valiýta 1 AQSh dollary úshin 60 rýblge deiin álsiredi", - delingen habarlamada.
Eske salaiyq, buǵan deiin Ulttyq Bank Qazaqstannyń ishki valiýta naryǵy joǵary qubylmalylyqqa ushyraýy múmkin ekendigin atap ótkendikten, Ulttyq Bank aiyrbastaý baǵamy boiynsha irgeli úrdisti qalyptastyrýǵa kedergi keltirmei, valiýta baǵamynyń turaqsyzdyqqa ákeletin kúrt ózgerýiniń aldyn alý maqsatynda valiýta naryǵynda óktemdikter júrgizý quqyǵyn saqtaǵan edi.
Bank ókilderiniń aitýynsha, infliatsiialyq targetteý rejimi jaǵdaiynda valiýtalyq óktemdikterdi paidalaný ekonomikasy damý ústindegi elderdiń álemdik praktikasyna sáikes keledi.
Aita keteiik, búgin ulttyq valiýta baǵamy KASE qor birjasynyń tańǵy saýdasynda álsirediUlttyq valiýtanyń dollarǵa shaqqandaǵy baǵamy 326,31 teńgege teń boldy.
